Në një incident tronditës gjatë ndeshjes së fundit të Super Ligës Turke midis Sivaspor dhe Göztepe, futbollisti i Kombëtares shqiptare, Rey Manaj, përfundoi pa ndjenja në fushë pas një përplasjeje të fortë me një kundërshtar. Ngjarja ndodhi në minutën e tretë të ndeshjes, kur Manaj u përplas me mbrojtësin e Göztepe, Koray Günter, pas një goditjeje me kokë që përfundoi në traversë.
Stafi mjekësor i Sivaspor ndërhyri menjëherë dhe një ambulancë u thirr në fushë për të transportuar Manaj në spital. Klubi konfirmoi se Manaj kishte rifituar ndjenjat në spital dhe se do të kryhen teste të mëtejshme për të vlerësuar gjendjen e tij shëndetësore.
Sipas mediave turke, fjalët e para të Manajt kane qene: “A do të mund të luaj në javën e ardhshme?” – duke dëshmuar keshtu dëshirën dhe angazhimin tij për futbollin.
Në një deklaratë për shtyp, Sivaspor tha: “Futbollisti ynë Rey Manaj humbi ndjenjat pas një përplasjeje në minutën e tretë të ndeshjes kundër Göztepe. Pas ndërhyrjes së parë mjekësore në fushë, ai u transportua me ambulancë në spital, ku rifitoi ndjenjat. Do të kryhen teste të mëtejshme dhe do të ndajmë informacione të tjera me publikun. I urojmë shërim të shpejtë futbollistit tonë”.
Ndërkohë, ndeshja vazhdoi dhe Sivaspor zëvendësoi Manaj me Veljko Simic në minutën e nëntë. Incidenti ka tronditur tifozët dhe komunitetin e futbollit, të cilët shpresojnë për një rikuperim të shpejtë dhe të plotë për Rey Manaj.
Foto nga Google Images
