Një ngjarje shqetësuese ndodhi gjatë sfidës së MMA në turneun “Oktagon”, ku sportisti shqiptar i arteve marciale mikse, Arijan Topallaj, humbi ndeshjen ndaj kundërshtarit Denis Frimpong. Përballja përfundoi me një “nokaut teknik” në raundet e fundit, pas së cilës Topallaj humbi ndjenjat në kafaz, duke alarmuar stafin mjekësor dhe publikun e pranishëm.
Menjëherë pas incidentit, sportisti u transportua me urgjencë në spital për trajtim dhe vlerësim të gjendjes shëndetësore. Edhe pse nuk janë dhënë ende detaje zyrtare për gjendjen e tij, burime pranë organizatorëve bëjnë me dije se ai është jashtë rrezikut për jetën.
Vetë Topallaj, në një postim në rrjetet sociale, i premtoi të gjithë mbështetësve se do rikthehet së shpejti.
“Falënderimi i qoftë Allahut për gjithçka. Çfarë sporti i çmendur që bëj, por e dua këtë gjë me gjithë shpirt. Edhe pse mbrëmja nuk shkoi siç ishte planifikuar, një gjë mund ta them me zemër të pastër: E lashë gjithçka në kafaz. Që nga raundi i dytë, trupi im nuk më dëgjoi më.
U thye fizikisht. Nuk e di në fund të ditës pse ndodhi kjo, por një gjë e di: Kam dhënë gjithçka në përgatitje dhe në luftë. Ndonjëherë është thjesht e pashpjegueshme – pse, për çfarë, nga se. Por Zoti ka plane më të mëdha sesa mund t’i kuptojmë ndonjëherë. Faleminderit ekipit tim, vëllezërve të mi, familjes sime dhe secilit prej jush që qëndroni pas meje. Keni qenë aty që nga fillimi dhe vazhdoni të jeni, pavarësisht gjithçkaje. Për këtë nuk kam fjalë, vetëm mirënjohje. Koha jonë do të vijë. Inshallah. Si do të vazhdojë më tej? Nuk e di ende. Kjo do të shihet në javët në vijim. Shihemi së shpejti, vetëm dashuri për të gjithë. Faleminderit nga zemra”- shkruajti ai.
Topallaj është një nga emrat në ngjitje të sportit të arteve marciale mikse dhe ka përfaqësuar denjësisht ngjyrat shqiptare në disa evente ndërkombëtare. Fansat dhe komuniteti sportiv shqiptar shpresojnë për një rikuperim të shpejtë dhe kthim të suksesshëm në arenën e konkurrencës.
Foto nga Google Images
