Mundësi shqiptar Chermen Valiev ka shkëlqyer në finalen e Kampionatit Botëror të Mundjes, duke u shpallur nënkampion bote dhe duke siguruar një medalje historike argjendi për Shqipërinë.
Në finalen e zhvilluar sot në Zagreb, Valiev u përball me japonezin Kota Takahashi në kategorinë 74 kilogramë, stil i lirë. Pas një dueli intensiv, përfaqësuesi shqiptar u mund me rezultatin 8-2, por gjithsesi arriti të ngjitej në podiumin botëror, duke hyrë në historinë e sportit shqiptar.
“Pavarësisht një dëmtimi të rëndë në ligament, ai zgjodhi të mos dorëzohej dhe vazhdoi garën me guxim e forcë të jashtëzakonshme. Dhimbja dhe pamundësia fizike nuk e lanë të triumfonte ashtu siç e meritonte, por nuk e ndaluan dot të siguronte një medalje të argjendtë të madhe për Shqipërinë”, u deklarua nga Federata.
Ky rezultat i jep jo vetëm lavdi sportistit, por edhe federatës shqiptare të mundjes, e cila prej vitesh ka punuar për të rritur nivelin e garuesve tanë në arenën ndërkombëtare. Medalja e argjendtë e Valiev vlerësohet si një nga sukseset më të mëdha të sportit shqiptar në disiplinën e mundjes.
Foto nga Google Images
Artikulli i përgatitur nga ACTVUSA
