Një operacion i guximshëm për shpëtimin e pilotit amerikan të rrëzuar në territorin iranian është cilësuar si një “mrekulli e Pashkëve” dhe një dëshmi e fuqisë së ushtrisë amerikane. Kështu u shpreh senatori republikan Dave McCormick gjatë një interviste televizive të dielën.
McCormick deklaroi se kishte folur drejtpërdrejt me një zyrtar të lartë të përfshirë në çdo hap të operacionit, duke theksuar se “ka shumë heronj në këtë histori”. Sipas tij, ky mision tregon qartë angazhimin e Shteteve të Bashkuara ndaj çdo ushtaraku të tyre, edhe në kushtet më të vështira.
“Kur hyn në territor armik, është jetike të dish se Amerika do të bëjë gjithçka për të të shpëtuar,” u shpreh ai.
Senatori vlerësoi gjithashtu guximin e vetë ushtarakut, duke e quajtur atë “një hero absolut”. Sipas McCormick, ai arriti të ngjitej në një lartësi prej rreth 7,000 këmbësh, pavarësisht se ishte i plagosur – një fakt që kishte befasuar edhe planifikuesit e operacionit, të cilët nuk e kishin imagjinuar se ai mund të arrinte në atë pikë për t’u lokalizuar dhe shpëtuar.
Operacioni i shpëtimit përfshiu qindra forca speciale dhe mjete ajrore, si dhe përdori taktika të avancuara të inteligjencës, përfshirë strategji devijimi për të lokalizuar vendndodhjen e ushtarakut. McCormick theksoi se ky ishte një operacion i jashtëzakonshëm që, sipas tij, vetëm ushtria dhe komuniteti i inteligjencës amerikane mund ta realizonin.
Ky zhvillim vjen në një kohë kur SHBA vijon operacionet kundër kapaciteteve ushtarake të Iranit. Senatori deklaroi se forcat amerikane kanë arritur të dëmtojnë ndjeshëm infrastrukturën ushtarake iraniane, duke përfshirë raketat, dronët, asetet detare dhe kapacitetet e prodhimit.
“Kemi bërë përparim të madh në arritjen e objektivave ushtarake, duke siguruar që Irani të mos ketë një rrugë drejt armës bërthamore,” tha ai.
Megjithatë, McCormick pranoi se ende ka punë për të bërë dhe se përpjekjet do të vazhdojnë në javët dhe muajt në vijim.
Ai preku edhe çështjen e financimit të ushtrisë, duke theksuar se Kongresi pritet të diskutojë rritje të buxhetit për mbrojtjen. Sipas tij, investimet shtesë janë të domosdoshme në një periudhë ndryshimesh të mëdha globale.
“Duhet absolutisht më shumë financim për të mbështetur ushtrinë tonë,” u shpreh senatori.
Në fund, ai komentoi edhe zhvillimet politike të brendshme, duke mbështetur projektligjin SAVE America Act dhe duke kritikuar kundërshtimin e demokratëve, ndërsa paralajmëroi përdorimin e mjeteve procedurale për ta çuar përpara këtë iniciativë.
Ngjarja e shpëtimit është kthyer në një simbol të vendosmërisë ushtarake amerikane dhe një histori që për shumëkënd përkon me simbolikën e shpresës dhe ringjalljes së festës së Pashkëve.
Ja nje pjese e fjales se tij:
“Sapo fola në telefon me administrator in e lartë i cili ishte thellësisht i përfshirë në çdo hap të operacionit, dhe ka kaq shumë heronj në këtë histori. Kur shkon në territorin armik, të dish se Amerika do të bëjë gjithçka që mundet te te ndihmoje, është kritike. Piloti ishte një hero absolut. Ai u ngjit 7,000 kembe. Kur planifikuesit po përpiqeshin të identifikonin se ku ishte ai, ata nuk mund ta imagjinonin se ai ishte i plagosur dhe në gjendje të arrinte në atë pikë ku ai përfundimisht mund të shpëtohej. Ky ishte një operacion i jashtëzakonshëm që vetëm Amerika, vetëm ushtria amerikane dhe komuniteti amerikan i inteligjencës mund ta kryenin. Ne kemi bërë përparim të jashtëzakonshëm nga çdo masë në objektivat ushtarake që presidenti ka përcaktuar, duke siguruar që Irani të mos ketë një rrugë drejt një arme bërthamore. Është e qartë se ka më shumë punë për të bërë. Absolutisht do të na duhen më shumë shpenzime. Ne duhet ta mbështesim ushtrinë tonë me fonde shtesë në një kohë ndryshimesh dramatike. Presidenti e përcaktoi që në ditën e parë se kjo do të ishte javë dhe muaj, por jo një angazhim i zgjatur, dhe ai është në rrugën e duhur me objektivat që ai përcaktoi. Gjëja më e rëndësishme është që demokratët te mbrojnë popullin amerikan pse janë kundër diçkaje që shumica e amerikanëve e mbështesin.”
Foto nga Google Images
Artikulli pregatitur nga ACTVUSA
