Presidenti Donald Trump ka hedhur idenë që Shtetet e Bashkuara të vendosin një lloj takse ose tarife për anijet që kalojnë nëpër Ngushticën e Hormuzit, një nga rrugët detare më të rëndësishme në botë për transportin e naftës. Gjatë një deklarate publike, ai u shpreh: “Po sikur të vendosim taksa ne? Do të preferoja ta bëja këtë, sesa t’ua lija atyre”, duke iu referuar mundësisë që Irani të kontrollojë dhe të përfitojë nga kalimi i anijeve në këtë pikë strategjike.
Kjo deklaratë vjen në një moment tensioni të lartë në rajon, ku Ngushtica e Hormuzit — përmes së cilës kalon një pjesë e madhe e furnizimit global me energji — është kthyer në një pikë kyçe për konfliktin dhe presionin gjeopolitik. President Trump ka sugjeruar konkretisht që SHBA mund të vendosë tarifa për kalimin e anijeve, duke e justifikuar këtë ide si një pasojë e rolit dhe ndërhyrjes amerikane në konflikt.
Megjithatë, një propozim i tillë përbën një ndryshim të madh në politikën ndërkombëtare detare, pasi Ngushtica e Hormuzit konsiderohet një rrugë ujore ndërkombëtare, ku liria e lundrimit është parim themelor. Ekspertët paralajmërojnë se çdo përpjekje për të vendosur tarifa nga një palë e vetme mund të shkaktojë përplasje ligjore dhe politike, si dhe të rrisë më tej tensionet mes fuqive globale.
Deklarata e Trump shton një tjetër element në një situatë tashmë të tensionuar, ku çmimet e naftës dhe stabiliteti i tregjeve globale varen drejtpërdrejt nga zhvillimet në këtë korridor jetik energjetik.
Ja nje pjese nga fjala e tij:
«Po sikur të vendosim taksa ne? Do të preferoja ta bëja këtë, sesa t’ua lija atyre. Pse të mos e bëjmë këtë? Ne jemi fituesit. Ne fituam. Në rregull? Ata janë të mundur ushtarakisht. Nëse do të kisha zgjedhjen time, po, sepse unë jam para së gjithash biznesmen”.
Foto nga Google Images
Artikulli pregatitur nga ACTVUSA
