Në 27-vjetorin e Epopesë së Dukagjinit, Presidentja e Kosovës, Vjosa Osmani, ka bërë homazhe në Kompleksin Memorial “Dëshmorët e Kombit” në Gllogjan, duke nderuar sakrificat dhe heroizmin e atyre që dhanë jetën për lirinë e Kosovës. Ky moment përkujton betejën e lavdishme të 24 marsit 1998, kur Ushtria Çlirimtare e Kosovës (UÇK) përballoi me guxim forcat serbe në një betejë të ashpër në Gllogjan, duke mbrojtur shtëpinë e familjes Haradinaj dhe duke treguar vendosmërinë për liri.
Pas homazheve, Presidentja Osmani vizitoi Kullën e Haradinajve, ku u prit nga Ramush Haradinaj, ish-komandanti i Zonës Operative të Dukagjinit, dhe familjarë të dëshmorëve. Ajo theksoi rëndësinë e ruajtjes së kujtesës historike dhe vlerave të luftës për brezat e ardhshëm, duke nënvizuar se sakrificat e dëshmorëve janë themeli i shtetit të Kosovës.
Aktivitetet përkujtimore për këtë ditë të shënuar përfshijnë homazhe, aktivitete kulturore dhe artistike, të organizuara nga Komuna e Deçanit. Epopeja e Dukagjinit mbetet një simbol i qëndresës dhe guximit të popullit të Kosovës në rrugën drejt lirisë dhe pavarësisë.
Foto nga profili i P. Vjosa Osmani
