Çdo student i mjekësisë që nuk përmbush detyrimin ligjor, për të ofruar shërbim shëndetësor nga 3- deri në 5 vite në vendin e tij ,do të duhet të paguajë një tarifë prej 240 mijë leke të reja për çdo vit studimi.
Tarifa u miratua një ditë më parë nga bordi i administrimit. Tanimë pritet të përpilohet kontrata që do të nënshkruajnë studentët.
Referuar vendimit të Këshillit të Ministrave, për të përcaktuar këtë tarifë u ngrit një grup pune për përllogaritjen e kostove për një student që ndjek studimet në fakultetin publik të mjekësisë.
Më pas kjo tarifë u kalua në senat dhe të hënën pasdite u miratua edhe nga bordi i administrimit.
Burime nga rektorati thonë se sërish kjo tarifë është nën kosto pasi nuk janë përfshirë shpenzimet për mjetet spitalore që përdorin studentët, apo për klasat e mësimit nëpër spitale.
Nuk dihet ende se si do të reagojnë studentët të cilët e kanë bojkotuar mësimin duke lënë bosh auditorët që në nisje të vitit të ri akademik të cilët janë shprehur se kërkojnë shfuqizimin e ligjit. Nëse një vit studimi ka kosto 240 mijë lekë, për 6 vite studentët duhet të paguajnë 1.440.000 lekë
“Unë jam vitit i gjashtë më bie më mirë të ofroj shërbim për dy vite , se sa të paguaj tarifën”, tha një prej studentëve.
Ndërkohë për studentët që do të nënshkruajnë kontratë dhe ndjekin specializimin në Shqipëri këto vite u zbriten atyre nga detyrimi. Pra nga 5 vite detyrim u mbeten të punojnë vetëm dy vite./Top-Channel.tv
