Dy partitë opozitare, Partia Demokratike e Kosovës dhe Aleanca për Ardhmërinë e Kosovës besojnë se në vjeshtë do të ketë situatë të re politike. Sipas deputetëve të këtyre partive një koordinim i opozitës është i nevojshëm në mënyrë që të rrëzohet Qeveria Kurti.
“Duhet me fuqizu mocionin në mënyrë që mocioni me arrit qëllimin për të cilin është bërë. Vjeshta do të jetë rrethanë e re në mënyrë që opozita të koordinohet dhe të shohë se në çfarë mënyrë do ta parashtrohet mocioni, i cili e bën të mundur shkuarjen në zgjedhje të parakohshme”, tha ajo.
Kurse, deputetja e Aleancës për Ardhmërinë e Kosovës, Time Kadrijaj, ka thënë se qëllimi i opozitës është që sa më shpejtë ta rrëzojë Qeverinë.
“Opozita e ka një qëllim që sa më shpejt ta dërgojë këtë qeveri në shtëpi, sepse po i bën dëm Kosovës. Duhet të ketë një koordinim sepse për mocion na duhen 61 vota për më rrëzu këtë qeveri”, tha ajo për Telegrafin.
Kadrijaj u shpreh më tej se deputetët e opozitës duhet të japin nënshkrimet për mocionin e mosbesimit.
Sipas deputetes Kadrijaj, Qeveria Kurti po shkakton vetëm dëme vendit, prandaj zgjidhja e duhur është rrëzimi dhe shkuarje në zgjedhje të reja parlamentare.
“Të gjitha partitë opozitare i kanë dhënë qëndrimet lidhur me situatën, duke ditur se në çfarë gjendje po shkon vendi, duke i ditur të gjitha dështimet që i ka pasur kjo qeveri, afera “zdravo”, afera me vajin dhe izolimi i Kosovës. Shkëputja e bashkëpunimit me aleatë qoftë me Bashkimin Evropian, qoftë me Shtetet e Bashkuara të Amerikës, situata në veri, mos-koordimi me faktorin ndërkombëtar dhe as me partitë politike”, pohoi ajo.
Si përfundim, Kadrijaj tha “të gjitha veprime të kësaj qeveria janë duke i bërë dëm Kosovës, sa më parë që kjo qeveri të shkon në shtëpi është më mirë për Kosovën”.
Lidhur me ngritjen e një mocioni mosbesimi, Telegrafi ka tentuar të marrë një përgjigje edhe nga deputetët e Lidhjes Demokratike të Kosovës, por të njëjtit nuk janë përgjigjur deri tani.
Në anën tjetër, LVV i quan dëshira deklarimet e opozitës për rrëzimin e Qeverisë Kurti.
Deputeti i LVV-së, Adnan Rrustemi tha për Telegrafin se nuk përzihet në dëshirat e tyre.
“Nuk mund të përzihem në dëshira opozitare. Ata janë të lirë në dëshirat e tyre”, u shpreh ai.
Mocioni i mosbesimit ndaj Qeverisë mund të ngrihet me propozimin e një të tretës (1/3) të të gjithë deputetëve të Kuvendit.
Sipas Kushtetutës së Kosovës, mocioni i mosbesimit vihet në rendin e ditë të Kuvendit, jo më vonë se pesë ditë e as më herët se dy ditë nga data e parashtrimit të tij.
Konsiderohet se mocioni i mosbesimit është pranuar, nëse për të kanë votuar shumica e të gjithë deputetëve të Kuvendit të Kosovës.
“Nëse mocioni i mosbesimit dështon, mocioni tjetër i mosbesimit nuk mund të ringrihet gjatë nëntëdhjetë (90) ditëve të ardhshme. Nëse mocioni i mosbesimit votohet për Qeverinë në tërësi, Qeveria konsiderohet në dorëheqje”, thuhet në Kushtetutën e Kosovës.
Ndryshe, Grupi Parlamentar i PDK-së në Kuvend ka 18 deputetë, LDK ka 16 deputetë, AAK ka 8 deputetë, komunitetet kanë po ashtu 8 përfaqësues si dhe pa grup parlamentar janë 14 deputetë. /Telegrafi
