Deputetët e partive opozitare si Lidhja Demokratike e Kosovës, Partia Demokratike e Kosovës, dhe Aleanca për Ardhmërinë e Kosovës kanë kërkuar që të vazhdohet seanca e jashtëzakonshme e cila ishte paraparë të zhvillohet paraditen e së enjtes së 12 tetorit.
Deputetët e partive opozitare si Lidhja Demokratike e Kosovës, Partia Demokratike e Kosovës he Aleanca për Ardhmërinë e Kosovës, kanë kërkuar që të vazhdohet seanca e jashtëzakonshme në mbështetje të Policisë së Kosovës.
Deputeti, Armend Zemaj nga radhët e LDK-së ka kërkuar që të respektohet rregullorja e punës së Kuvendit që sipas të cilës thuhet se një seancë e jashtëzakonshme duhet të përfundojë që më pas të vazhdojë seanca tjetër.
“Seanca e jashtëzakonshme e cila kishte të bënte për mbështetjen urgjente të Policisë së Kosovës, nuk është mbajtur, ka filluar por nuk u mbajt për shkak të mungesës së shumicës kuvendore. Iu thërras që ta respektoni rregulloren e punës së kuvendit, të marrë përfundimin ajo seancë e më pas të fillojmë seancën e re të thirrur si vazhdim i seancës për pikat e mbetura”, tha ai.
Në anën tjetër, deputetja nga radhët e PDK-së, Ganimete Musliu, ka thënë se asnjë seancë tjetër e asnjë temë nuk është më me prioritiet se siguria e vendit.
“Kërkoj që të kthehet seanca e jashtëzakonshme dhe të procedojmë që ta votojmë Rezolutën e cila kërkon të mbështeten kërkesat e Policisë së Kosovës”, tha ajo.
“Nuk mjafton të fotografohemi me policë e të përqafohemi me ta… Policia e Kosovës ka nevojë urgjente që t’i plotësohen kërkesat. A duhet të presim që të vdes edhe një polic që familjeve t’ia japim 50 mijë euro siç ndodhi me Afrim Bunjakun. T’i respektojmë e nderojmë ata policë sa janë gjallë, për punën që e bëjnë, mos e degradoni policinë e Kosovës”, shtoi ajo.
Edhe deputeti nga radhët e aleancës për Ardhmërinë e Kosovës, Bekë Berisha, ka kërkuar plotësimin e kushteve të Policisë së Kosovës.
Ndërkaq, kryetari i Kuvendit, Glauk Konjufca, ka thënë se ajo seancë nuk ka marrë epilog sepse nuk ka filluar. Ndërsa ka thënë se do të vazhdohet me seancën e planifikuar.
