Inxhinierët dhe arkitektët detarë po përgatiten të sjellin në jetë një nga projektet më ambicioze dhe futuriste ndonjëherë: një anije gjigande në formën e një breshke, e cila pritet të jetë më e madhja në histori dhe të strehojë deri në 60 mijë pasagjerë.
E quajtur “Pangeos”, kjo strukturë gjigante e dizenjuar nga studioja italiane “Lazzarini Design” kombinon teknologjinë detare më të avancuar me konceptin e një qyteti lundrues. Me gjatësi prej 550 metrash dhe gjerësi që kalon 600 metra, ajo do të funksionojë si një qytet i lëvizshëm – me banesa, hotele, qendra tregtare, parqe, aeroporte vertikale dhe gjithçka tjetër që nevojitet për një jetë të plotë në det.
Një qytet i vetëqëndrueshëm
Anija do të jetë e pajisur me energji të rinovueshme – duke përfshirë panele diellore dhe turbina që përfitojnë nga era dhe rrymat e oqeanit – për ta bërë atë tërësisht të qëndrueshme nga ana mjedisore. Sipas zhvilluesve të projektit, Pangeos nuk është vetëm një anije, por një ekosistem lundrues, i aftë të funksionojë për dekada të tëra pa ndalur.
Arkitektura në formë breshke është e qëllimshme: jo vetëm si simbol i qëndrueshmërisë dhe jetës së gjatë, por edhe për stabilitet të jashtëzakonshëm në det të hapur. Struktura është projektuar për t’i bërë ballë dallgëve më të mëdha dhe kushteve ekstreme të motit.
Kosto marramendëse dhe ambicie globale
Projekti Pangeos pritet të kushtojë mbi 8 miliardë dollarë dhe ndërtimi i tij do të kërkojë një doku gjigand të posaçëm, i cili mund të ndërtohet në Arabinë Saudite ose në një nga portet kryesore të Mesdheut. Ndërtimi parashikohet të zgjasë deri në 8 vjet nga momenti i miratimit përfundimtar.
Jo thjesht anije, por vizion
Pangeos shihet si një përfaqësim i vizionit të së ardhmes për jetën në det – një përgjigje ndaj mbipopullimit, ndryshimeve klimatike dhe kërkesës për forma alternative të banimit dhe turizmit. Nëse realizohet, do të jetë një prej arritjeve më spektakolare të inxhinierisë moderne dhe një magnet i padiskutueshëm për turistë, studiues dhe aventurierë nga e gjithë bota.
Foto nga Google Images
