Kreu i Grupit Parlamentar të Partisë Demokratike, Gazment Bardhi, ka ngritur shqetësimin për ndërprerjen e mësimit të maturantëve në qytetin e Fierit, për të marrë pjesë në një aktivitet politik të organizuar nga zv/kryeministrja Belinda Balluku. Në një postim në rrjetet sociale, Bardhi e ka cilësuar këtë veprim si një “krim” dhe ka kërkuar ndërhyrjen e SPAK për të hetuar dhe ndëshkuar përgjegjësit.
“Mirëmëngjes! Uroj të jeni mirë! Ditën e djeshme, Belinda Balluku ka shpërndarë në Facebook çeljen e panairit të punës në Fier. Sot, drejtorët e shkollave kanë njoftuar mësuesit të shoqërojnë nxënësit e maturave, të ndërpresin mësimin dhe të shoqërojnë nxënësit në panair,”
Sipas denoncimit të publikuar nga Bardhi, mësuesit dhe nxënësit janë detyruar të braktisin orët e mësimit për të marrë pjesë në një panair pune të organizuar nga Balluku. Ai ka theksuar se ky veprim është në kundërshtim me ligjin dhe etikën profesionale, duke e cilësuar si një keqpërdorim të hapur të arsimit për qëllime politike.
Bardhi ka bërë thirrje për veprim të menjëhershëm nga institucionet përkatëse, duke theksuar se ndërprerja e mësimit për aktivitete politike dëmton integritetin e sistemit arsimor dhe të drejtën e nxënësve për arsimim cilësor.
Foto nga Ballkanweb
