Grupi parlamentar i Partisë Demokratike, përfaqësuar nga kreu Gazment Bardhi, ka njoftuar misionet diplomatike dhe përfaqësuesit e huaj në Shqipëri me anë të një letre për situatën e krijuar gjatë seancës plenare ku u miratuan programi politik dhe kabineti qeveritar. Sipas PD-së, ky proces është zhvilluar “nga shumica parlamentare” pa respektuar debatin parlamentar dhe procedurat kushtetuese dhe rregulloren e Kuvendit.
Demokratët shprehin shqetësim për shkeljen e rregullave të brendshme të Kuvendit dhe të parimeve kushtetuese, duke përmendur ndërprerjen e fjalës së kryeministrit gjatë prezantimit të programit qeverisës për një arsye që ata e quajnë të jashtëzakonshme.
Letra vë theksin tek përpjekja për të “minuar demokracinë parlamentare”, sipas PD-së, duke e konsideruar aprovimin e kabinetit pa debat të konsiderueshëm politik si një precedent të rrezikshëm që shkel transparencën dhe kontrollin parlamentar.
Gjithashtu, theksohet se në këtë mënyrë opozita është përjashtuar nga proceset kyçe parlamentare, duke u privuar nga e drejta për të kontribuar në komisione dhe debate që kanë rëndësi për qeverisjen dhe integrimin euroatlantik të vendit.
Gazmend Bardhi ka akuzuar shumicën për sjellje autoritare, duke thënë se ndryshimet e organizimit të komisioneve dhe mënyra se si u morën vendimet tregojnë një shpërfillje të rolit të opozitës dhe një përpjekje për të centralizuar pushtetin në ekzekutiv.
Kjo situatë evidenton tensionet midis shumicës dhe opozitës në Kuvend, sidomos për sa i përket transparencës, debatit dhe legjitimitetit të vendimeve parlamentare. Letra e PD-së nxit pyetje të rëndësishme: Sa respektohen procedurat kushtetuese, si mund të garantohet kontrolli parlamentar mbi ekzekutivin, dhe çfarë roli ka opozita në vendim-marrje që kanë impakt tek qytetarët.
Letra e Gazment Bardhi dërguar trupit diplomatik në Shqipëri:
“Të nderuar Shkëlqësi,
Ju drejtohemi me këtë letër për të sjellë në vëmendjen tuaj situatën e paprecedentë që ndodhi sot gjatë seancës plenare të Kuvendit të Shqipërisë, e thirrur për miratimin e programit politik dhe kabinetit të ri qeveritar, në të cilën ju ishit të ftuar si pjesëmarrës.
Për herë të parë në 35 vitet e pluralizmit politik në Shqipëri, u shkel në mënyrë flagrante Kushtetuta, Rregullorja e Kuvendit dhe çdo normë e praktikës demokratike.
Përmes veprimeve antikushtetuese dhe në shkelje të rregullave të brendshme të Kuvendit, të ndërmarra nga Kryetari i Kuvendit dhe lideri i mazhorancës parlamentare, u pengua në mënyrë të qëllimshme debati politik i përfaqësuesve të qytetarëve, duke dëmtuar rëndë demokracinë parlamentare dhe bashkëjetesën politike brenda institucioneve legjitime të demokracisë.
Si përfaqësues të qytetarëve shqiptarë në Kuvend, ne e ndjekim me shqetësim erozionin e autoritetit të institucionit më të lartë të vendimmarrjes, Kuvendit të Shqipërisë, dhe përpjekjen për ta shndërruar atë në një shtrirje të Këshillit të Ministrave, duke eliminuar plotësisht kontrollin parlamentar mbi mazhorancën dhe ligjet që paraqiten për shqyrtim dhe miratim.
Dinamikat e ngjarjeve të sotme tregojnë qartë një plan të orkestruar nga Kryeministri Rama për të provokuar hapur opozitën parlamentare.
Përmes këtyre veprimeve të paprecedenta, në shkelje të Rregullores së Kuvendit dhe duke anuluar parimet kushtetuese, deputetëve të opozitës iu mohua qëllimisht e drejta për një debat politik të thelluar dhe konstruktiv mbi programin qeveritar dhe kabinetin.
Po ashtu, ne shprehim shqetësim për veprimin e rëndë të Kryeministrit Rama ndaj përfaqësuesve të lartë të korpusit diplomatik të akredituar në vendin tonë, të cilët morën pjesë në këtë seancë solemne, me rëndësi të veçantë për fillimin e çdo legjislature të re.
Në dritën e delegjitimimit të kësaj seance plenare dhe në mbrojtje të kushtetueshmërisë së procesit, deputetët e opozitës në Kuvend kërkuan që solemniteti i kësaj seance plenare të respektohej. Sipas nenit 97 të Kushtetutës, dhe në përputhje me nenin 110, pika 2 e Rregullores së Kuvendit, deputetët e opozitës kërkuan disa herë nga Kryetari i Kuvendit që t’i lejohej Kryeministrit të vazhdonte fjalimin e tij, pasi ky u ndërpre në mënyrë të paprecedentë për të paraqitur një mesazh video të inskenuar nga e ashtuquajtura “Ministria e Inteligjencës Artificiale Diella”.
Në të gjithë historinë e pluralizmit parlamentar shqiptar, fjalimi i Kryeministrit gjatë seancës plenare për miratimin e programit politik dhe të kabinetit të qeverisë nuk është ndërprerë për asnjë arsye.
Për më tepër, Kryetari i Kuvendit, në shkelje të nenit 48, pika 1 të Rregullores së Kuvendit, nuk i drejtoi thirrje zotit Edi Rama në cilësinë e tij si deputet për ta thirrur kur ai largohej nga substanca e çështjes, pra prezantimi, përmes inskenimit të një mesazhi video nga një karakter virtual, në një kohë kur ai duhej të vazhdonte pa ndërprerje prezantimin e programit politik.
Në këtë kontekst, përgjigjia e paprecedentë e Kryetarit të Kuvendit dhe shkeljet e rënda të Kushtetutës dhe Rregullores së Kuvendit krijuan një precedent të rrezikshëm për këtë legjislaturë të re, duke krijuar standarde të dyfishta në dhënien e të drejtave procedurale.
Zoti Peleshi dy herë radhazi i dha të drejtën procedurale Kryetarit të grupit të mazhorancës parlamentare, ndërsa ia mohoi këtë të drejtë, të parashikuar në nenin 49 të Rregullores së Kuvendit, Kryetarit të Grupit Parlamentar të Partisë Demokratike.
Kështu, në mënyrë antikushtetuese, Kryetari i Kuvendit miratoi një rend politik që vinte nga Kryetari i grupit të mazhorancës, duke mbyllur seancën plenare me miratimin e programit politik dhe kabinetit të ri qeveritar pa debat politik, në shkelje të nenit 97 të Kushtetutës dhe në shkelje të rënda të nenit 110 të Rregullores së Kuvendit.
Mohoi e drejta për debat parlamentar, shkeljet e përsëritura të ligjit themeltar të vendit dhe shkeljet e rregullave të brendshme të Kuvendit demonstrojnë qartazi një përpjekje të qëllimshme për të minuar rendin kushtetues dhe për të uzurpuar autoritetin legjitim të institucioneve demokratike të vendit.
Në këtë situatë të paprecedentë, ne shprehim shqetësimin tonë për minimin e jetës parlamentare, mohimin e të drejtës kushtetuese të deputetëve për debat politik dhe, mbi të gjitha, për mosrespektimin e vullnetit sovran të qytetarëve shqiptarë, duke tentuar shuarjen totale të trupit më të lartë përfaqësues të vullnetit të tyre politik.
Ne shprehim me shqetësim të thellë erozionin e vazhdueshëm të rolit të Kuvendit si institucioni më i lartë vendimmarrës në Shqipëri.
Ngjarjet e sotme demonstruan një plan të orkestruar nga Kryeministri Edi Rama për të provokuar hapur opozitën parlamentare dhe për ta shndërruar Kuvendin në një vazhdimësi të Këshillit të Ministrave, duke eliminuar kontrollin parlamentar mbi mazhorancën dhe ligjet që paraqiten për shqyrtim dhe miratim.
Prandaj, ne e shohim si detyrë të informojmë komunitetin diplomatik të akredituar në Tiranë për këto zhvillime të rënda, që rrezikojnë seriozisht demokracinë parlamentare dhe rendin kushtetues në Shqipëri.”
Foto nga Google Images
Artikulli i përgatitur nga ACTVUSA
