Një përplasje e re tregtare duket në horizont mes Bashkimit Evropian dhe Shteteve të Bashkuara, pas deklaratës së Presidentit amerikan Donald Trump se, duke filluar nga data 1 gusht, do të vendoset një tarifë 30% mbi eksportet evropiane që hyjnë në tregun amerikan.
Deklarata e Trump ka shkaktuar reagime të menjëhershme në Bruksel, ku Presidentja e Komisionit Evropian, Ursula von der Leyen, ka përsëritur publikisht vullnetin e BE-së për të shmangur përshkallëzimin e konfliktit dhe për të arritur një marrëveshje të drejtë dhe të balancuar me Shtetet e Bashkuara të Amerikës.
“Bashkimi Evropian mbetet i përkushtuar për një partneritet të fortë transatlantik dhe ne jemi të gatshëm të punojmë me administratën amerikane për të gjetur një zgjidhje që mbështet tregtinë e lirë, të ndershme dhe të hapur,” u shpreh von der Leyen në një deklaratë zyrtare të bërë sot nga Brukseli.
Në përgjigje të kërcënimeve tregtare nga SHBA, Bashkimi Evropian po shqyrton aktivizimin e një mekanizmi të posaçëm mbrojtës, i cili i jep mundësinë të shkojë përtej tarifave tradicionale, duke vendosur kufizime jo vetëm mbi mallrat, por edhe mbi shërbimet amerikane. Ky mekanizëm, i parashikuar nga traktatet e BE-së dhe i bazuar në parimin e reciprocitetit, mund të përfshijë masa kundër kompanive amerikane që operojnë në sektorë strategjikë si financat, teknologjia dhe transporti. Një lëvizje e tillë do të përbënte një sinjal të fortë politik dhe ekonomik se BE nuk do të qëndrojë pasive përballë sulmeve të njëanshme tregtare, por do të mbrojë interesat e saj me të gjitha mjetet që i jep ligji ndërkombëtar dhe rregullat e OBT-së.
“Instrumenti kundër shantazhit është krijuar për situata të veçanta, dhe ende nuk kemi arritur në atë pikë,” shtoi Von der Leyen.
Tarifat e paralajmëruara nga Trump përfshijnë një gamë të gjerë produktesh evropiane, nga makinat, tek çeliku dhe ushqimet e përpunuara, çka pritet të ketë ndikim të ndjeshëm në ekonomitë e vendeve anëtare të BE-së, veçanërisht Gjermanisë, Francës dhe Italisë.
Administrata Trump ka justifikuar masën si një përgjigje ndaj “praktikave të padrejta tregtare të BE-së” dhe si një përpjekje për të mbrojtur prodhuesit amerikanë. Por zyrtarët evropianë e kanë quajtur vendimin të njëanshëm dhe të dëmshëm për marrëdhëniet mes dy blloqeve më të mëdha ekonomike në botë.
Në qarqet diplomatike evropiane ka gjithnjë e më shumë shqetësim se vendimi i Trump është jo vetëm ekonomik, por edhe politik, në një kohë kur marrëdhëniet transatlantike janë përfshirë nga tensione të përsëritura mbi çështje të sigurisë, klimës dhe rregullave të tregtisë globale.
Bashkimi Evropian pritet të mblidhet në ditët në vijim për të diskutuar një përgjigje të koordinuar ndaj kësaj lëvizjeje amerikane. Nuk përjashtohet mundësia e masave reciproke, nëse negociatat dështojnë dhe tarifat hyjnë realisht në fuqi.
Nëse situata nuk zgjidhet përmes dialogut, bota mund të përballet me një luftë të re tregtare që do të prekë jo vetëm marrëdhëniet BE-SHBA, por edhe stabilitetin ekonomik global.
Për momentin, topi mbetet në fushën e diplomacisë. Pyetja është: A do të ketë vullnet të mjaftueshëm nga të dyja palët për të shmangur përplasjen?
Foto nga Google Images
Artikulli i përgatitur nga ACTVUSA
