Kryedemokrati Sali Berisha ka reaguar ashpër ndaj deklaratave të kryeministrit Edi Rama, të bëra gjatë një takimi në Dibër, ku ky i fundit i quajti “çyrykë” gjysmën e burrave. Në një deklaratë publike, Berisha e cilësoi gjuhën e përdorur nga Rama si një “gjuhë kopuku,” duke e akuzuar për mungesë respekti ndaj qytetarëve dhe traditave shqiptare.
“Shkoi në Peshkopi dhe me gjuhën e një kopuku u tha se zonja gjysma juaj burrat i ka çyrykë. Unë i them Ramës, ta dish mirë, se në ligj, në kanun dhe në ligjin e sotëm qafën e buallit nuk e kishe kaluar ti pa të tredhur dibranet. Po ata janë burra të mençur dhe e dinë që i tredhuri nuk tridhet më”, tha Berisha.
Berisha theksoi se një kryeministër duhet të jetë shembull i etikës dhe i dinjitetit, duke shtuar se fjalët e Ramës janë një fyerje për burrat dhe gratë e Dibrës. Ai gjithashtu përmendi rëndësinë e ruajtjes së vlerave tradicionale dhe të respektit në komunikimin publik, duke e cilësuar këtë incident si një shembull të degradimit të diskursit politik në vend.
Deklaratat e Ramës kanë ngjallur reagime të shumta, jo vetëm nga opozita, por edhe nga qytetarët, të cilët kanë shprehur pakënaqësinë e tyre në rrjetet sociale. Ndërkohë, Berisha ka bërë thirrje për një debat më të civilizuar dhe për një qasje më të përgjegjshme nga ana e qeverisë.
Ky incident vjen në një kohë kur tensionet politike në Shqipëri janë të larta, duke reflektuar polarizimin e skenës politike dhe sfidat e komunikimit mes palëve.
Foto nga Google Images
