Vendimi i Presidentit amerikan Donald Trump për bllokimin e Ngushtica e Hormuzit ka hyrë në fuqi këtë të hënë në orën 16:00 me oren lokale, ashtu siç ishte paralajmëruar, pas dështimit të bisedimeve mes Shtetet e Bashkuara të Amerikës dhe Iran një ditë më parë.
Megjithëse ushtria amerikane nuk ka dhënë ende një konfirmim zyrtar për zbatimin e plotë të bllokadës, Komanda Qendrore e Shteteve të Bashkuara (CENTCOM) njoftoi më herët se operacioni do të niste pikërisht në këtë orar, në përputhje me deklaratat publike të Trump.
Sipas njoftimit të CENTCOM, masa do të zbatohet në mënyrë të paanshme ndaj të gjitha anijeve, pavarësisht kombësisë së tyre. “Bllokada do të zbatohet kundër anijeve të të gjitha kombeve që hyjnë ose dalin nga portet dhe zonat bregdetare iraniane, duke përfshirë të gjitha portet në Gjirin Arabik dhe Gjirin e Omanit”, thuhet në deklaratë.
Ngushtica e Hormuzit konsiderohet një nga pikat më të rëndësishme strategjike në botë për transportin e naftës, pasi një pjesë e madhe e furnizimit global kalon përmes saj çdo ditë. Çdo ndërprerje në këtë korridor detar ka potencialin të shkaktojë tronditje të menjëhershme në tregjet ndërkombëtare të energjisë.
Ndërkohë, kryetari i parlamentit Muhamed Galibaf ka deklaruar në një postim në platformën X se Shtetet e Bashkuara mund të përballen me rritje të ndjeshme të çmimeve të karburantit, duke sugjeruar se periudha aktuale e çmimeve më të ulëta mund të kujtohet si më e favorshmja për konsumatorët amerikanë. Ai la të kuptohet se zhvillimet e fundit mund të kenë ndikim negativ në tregun e energjisë dhe në çmimin e benzinës në SHBA.
“Shijoni çmimet e tanishme të karburantit. Me të ashtuquajturin ‘bllokim’, së shpejti do të ndjeni nostalgji për naftën 4–5 dollarë,”- shkroi ai.
Kjo situatë vjen në një moment kur tregjet e energjisë janë tashmë të tensionuara dhe çdo zhvillim i ri gjeopolitik mund të ndikojë drejtpërdrejt në çmimet për konsumatorët. Nëse bllokada do të zbatohet plotësisht dhe do të zgjasë, ekspertët paralajmërojnë për një valë të re inflacioni, veçanërisht në sektorët e transportit dhe ushqimit.
Ndërkohë, mbetet për t’u parë reagimi i Iranit dhe i komunitetit ndërkombëtar, pasi një përshkallëzim i mëtejshëm në këtë rajon mund të ketë pasoja të gjera jo vetëm për ekonominë globale, por edhe për stabilitetin politik në Lindjen e Mesme.
Foto nga Google Images
Artikulli pregatitur nga ACTVUSA
