Kryeministri Edi Rama ka shpallur nisjen e një operacioni kombëtar për çlirimin e hapësirave publike nga çdo formë uzurpimi, një ndër ndërhyrjet më të ashpra të qeverisë kundër abuzimit me pronën publike. Me tone të drejtpërdrejta dhe një ultimatum të prerë, Rama paralajmëroi se çdo pengesë që privon qytetarët nga të drejtat e tyre në trotuare, hapësira rreth pallateve apo sheshe publike, do të hiqet pa kompromis.
2 javë afat për “zaptuesit” e hapësirës publike
Operacioni do të nisë në mes të muajit korrik dhe do të shtrihet në të gjithë Shqipërinë. Por përpara ndërhyrjes fizike të policisë bashkiake dhe strukturave inspektuese, qeveria ka dhënë një afat 2-javor për të gjithë ata që kanë zënë hapësira publike në mënyrë të paligjshme, që të largojnë vetë çadrat, trarët, tendat dhe çdo objekt tjetër që pengon lëvizjen dhe jetën e përbashkët urbane.
“Nëse nuk i çmontojnë vetë, do t’ua çmontojmë ne dhe do përballen me gjoba, madje edhe me ndjekje penale për krim mjedisor dhe zaptim prone publike,” – paralajmëroi kryeministri.
Çfarë do të goditet konkretisht?
Sipas Ramës, operacioni do të përqendrohet në tre kategori kryesore të abuzimit me hapësirat publike:
• Trarët në hyrje të pallateve, që përdoren për të nxjerrë para nga banorët në mënyrë abuzive, shpesh nën kontrollin e ndërtuesve apo individëve që nuk kanë asnjë të drejtë ligjore mbi to.
• Hapësirat përreth pallateve, që janë të përbashkëta për komunitetin, por janë trajtuar nga ndërtuesit si pronë private, duke u kthyer në objekte biznesi apo parkime të mbyllura.
• Trotuaret e zaptuara nga lokalet dhe baret, që me tenda, mushama dhe ndërtesa të përkohshme pushtojnë sipërfaqe publike, shpesh duke lejuar pirjen e duhanit në kundërshtim me ligjin dhe duke dëmtuar përvojën e qytetarëve në hapësirën e përbashkët.
Fokus i veçantë: Vlorë, por edhe gjithë qytetet e mëdha
Kryeministri nuk kurseu kritikat për autoritetet lokale, veçanërisht në qytetin e Vlorës, ku sipas tij zaptimi i hapësirave është bërë “i papranueshëm dhe i pajustifikueshëm”. Ai kritikoi “sy mbylljen” e strukturave që kanë lejuar këtë situatë për vite me radhë, duke paralajmëruar se “asnjë zyrtar vendor nuk do të tolerohet nëse pengon apo neglizhon zbatimin e këtij aksioni.”
Shteti zbret në terren: inventar i plotë dhe veprim pa kthim mbrapa
Deputetët dhe strukturat vendore janë ngarkuar me detyrën e hartimit të një inventari të plotë të të gjitha hapësirave të zëna paligjshëm, për të përgatitur terrenin për ndërhyrjen. Sipas Ramës, në pjesën e dytë të korrikut, shteti do të aktivizojë të gjitha inspektoratet, policitë bashkiake dhe Policinë e Shtetit, për të nisur një aksion të pandalshëm.
Kryeministri Rama theksoi se ky operacion nuk ka vetëm karakter ligjor, por edhe moral dhe qytetar. Ai e quajti këtë një “çlirim të hapësirës publike”, ku qytetarët, familjet, fëmijët dhe të moshuarit mund të ecin, të pushojnë dhe të marrin frymë lirshëm, pa ndjerë se jetojnë në një hapësirë të grabitur.
“Territore të tëra janë kthyer në ‘tokë të xanun’. Tani është koha t’i japim fund këtij abuzimi,” – tha ai.
Thirrja e fundit: “Filloni të mbledhni plaçkat”
Në një mesazh të qartë për të gjithë ata që kanë ndërtuar mbi hapësirën publike dhe kanë përfituar prej saj në mënyrë të padrejtë, Rama përfundoi:
“U bëj thirrje të gjithë atyre që janë të keqkuptuar, por që fatkeqësisht ia kanë dalë për një kohë të gjatë të bëjnë para në dëm të komuniteteve: filloni të mbledhni plaçkat! Sepse boll është boll, boll është boll!”
Foto nga Google Images
Artikulli i përgatitur nga ACTVUSA
