Strategu politik amerikan Chris LaCivita, i cili po drejton fushatën e Partisë Demokratike në Shqipëri, ka bërë një thirrje të fortë për të rinjtë, duke i inkurajuar ata të angazhohen në procesin politik dhe të marrin në dorë fatin e vendit. Në një takim me të rinjtë e FRPD në Tiranë, LaCivita theksoi se kjo fushatë ka në qendër ekonominë dhe të ardhmen, duke i nxitur të rinjtë të bëhen pjesë aktive e ndryshimit.
Gjatë fjalës së tij, LaCivita u shpreh se politikat e viteve të fundit kanë vështirësuar mundësitë për të rinjtë në Shqipëri, duke i detyruar shumë prej tyre të kërkojnë një të ardhme jashtë vendit. Ai theksoi se të rinjtë duhet të ngrihen dhe të bëjnë që zëri i tyre të dëgjohet, pasi ata kanë fuqinë për të ndryshuar drejtimin e vendit.
LaCivita vuri theksin te siguria ekonomike dhe personale, duke e cilësuar si një nga shqetësimet kryesore të të rinjve. Ai solli shembullin e fushatës së Presidentit Trump në SHBA, ku të rinjtë iu përgjigjën pozitivisht thirrjes për ndryshim, duke u angazhuar në procesin politik dhe duke kërkuar politika që mbështesin zhvillimin ekonomik dhe mundësitë për punësim.
Strategu amerikan theksoi se të rinjtë duhet të marrin pjesë aktive në fushatë, duke përdorur platformat moderne të komunikimit për të ndarë mesazhet e tyre dhe për të mobilizuar votuesit. Ai nënvizoi se bota drejtohet nga ata që ngrihen, duke i inkurajuar të rinjtë të mos qëndrojnë pasivë, por të marrin në dorë të ardhmen e tyre përmes pjesëmarrjes në zgjedhje.
Duke e cilësuar këtë fushatë si një mundësi për të rinjtë që të ndikojnë në të ardhmen e vendit, LaCivita i ftoi ata të jenë pjesë e procesit politik dhe të mos lejojnë që vendimet të merren pa zërin e tyre. Ai theksoi se Shqipërisë i duhen liderë të rinj, të angazhuar dhe të motivuar, të cilët mund të sjellin ndryshime reale në jetën e qytetarëve.
Ja nje pjese nga fjala e tij:
“Unë mendoj se është jashtëzakonisht e rëndësishme që në politikë, qoftë në Shtetet e Bashkuara apo këtu në Shqipëri, të rinjtë dhe votuesit e rinj të përfshihen dhe të marrin në dorë fatin e qeverisjes së tyre, sepse e ardhmja jeni ju.
Unë mendoj se politikat e 12 viteve të fundit e kanë bërë shumë vështirë të ardhmen dhe për mundësitë për të rinjtë. Por shumë nga politikat që sjell Dr. Berisha, synojnë pikërisht që ju të mund të qëndroni këtu, të gjeni mundësi, të keni sukses, dhe të ndihmoni në ndërtimin e vendit.
Prandaj është shumë e rëndësishme, dhe ju e dini. Për fushatën është thelbësore që t’i japë mesazhet aty ku ndodhen votuesit. Shumica prej jush nuk e merrni informacionin nga burimet tradicionale, si media klasike. Ju informoheni përmes rrjeteve sociale, përmes internetit dhe platformave të ndryshme. Kështu që, është shumë e rëndësishme që ne të komunikojmë me të gjithë ju.
Por po aq e rëndësishme është që edhe ju të angazhoheni, të shprehni mendimin tuaj, dhe të siguroheni që miqtë dhe familjarët tuaj të dalin dhe të votojnë.
E gjithë kjo fushatë ka të bëjë me çështjen më të rëndësishme: ekonominë dhe të ardhmen. Dhe ju djema, e keni plotësisht në dorë ta ndryshoni të ardhmen dhe drejtimin e këtij vendi. Por nuk mund ta bëni këtë nëse nuk ngriheni.
Ka një shprehje të vjetër në Amerikë: “Bota drejtohet nga ata që ngrihen.” Dhe është shumë, shumë e rëndësishme që ju të merrni pjesë dhe të bëni që zëri juaj të dëgjohet”, tha strategu amerikan.
Foto nga Google Images
