Partia Demokratike do të dalë e ndarë në zgjedhjet vendore të 14-majit edhe në Bashkinë e Mirditës, ku pati tentative për bashkim. Pavarësisht negociatave për rreth 4 muaj nuk u arrit një marrëveshje dhe Partia Demokratike zyrtare do të dalë me kandidatin e saj në këtë njesi vendore.
Diçka e tillë u bë e ditur nga kreu i komanduar i PD, Enkelejd Alibeaj, gjatë takimit me strukturat e kësaj force politike në Mirditë. Sipas Alibeajt janë bërë të gjitha përpjekjet për bashkimin e demokratëve në mbarë vendin pa kushte, por kjo forcë politike asnjëherë nuk mund të orjentohet drejt një partie të majtë siç është Partia e Lirisë.
Kreu i demokrateve në Mirditë, Mark Ruçi, tha se kjo forcë politike do të përfaqësohet denjësisht në zgjedhjet vendore të 14-majit, pasi është e pafalshme që kjo forcë politike të mos ekzistojë.
Partia Demokratike zyrtare pritet të kandidojë Mark Ruçin, për zgjedhjet vendore të 14-majit në Bashkinë Mirditë. Ai ka drejtuar për dy mandate Bashkinë e Mirditës, duke patur një eksperiencë të gjatë në pushtetin vendor dhe politikën lokale.
