Bashkia Shkodër ka njoftuar zyrtarisht sot se të gjithë Administratorët e Njësive Administrative në territorin e saj kanë paraqitur dorëheqjet nga pozicionet që mbanin deri më tani. Vendimi i tyre vjen si pasojë e drejtpërdrejtë e kërkesës së Kryeministrit Edi Rama, gjatë një takimi të zhvilluar pak ditë më parë në Durrës me drejtuesit e bashkive nga e gjithë Shqipëria.
Në atë takim, Rama kërkoi një riformatim të thellë të strukturave administrative në nivel vendor, duke nënvizuar nevojën për efikasitet, përgjegjshmëri dhe lidhje më të ngushtë me qytetarin. Ai theksoi se administrimi i njësive vendore nuk mund të mbetet peng i “zakoneve të vjetra”, por duhet të përqafojë një standard të ri të shërbimit publik.
Dorëheqjet në Shkodër ndjekin të njëjtën linjë me ato që ndodhën më herët në Bashkinë e Elbasanit, ku edhe aty të gjithë administratorët dhanë dorëheqjen, duke iu përgjigjur pozitivisht thirrjes së Kryeministrit për riorganizim.
Ky zhvillim shënon një moment të pazakontë në administratën vendore, ku lëvizjet nuk janë bërë mbi baza politike, por mbi kërkesën për standarde të reja pune dhe rritje të performancës.
Deri tani, nuk ka ende emra konkretë për zëvendësuesit e administratorëve të dorëhequr, por burime pranë bashkive bëjnë të ditur se një proces përzgjedhjeje në konsultim me qeverinë qendrore do të nisë së shpejti.
Foto nga Google Images
Artikulli i përgatitur nga ACTVUSA
