Zyrtarët e shëndetësisë në Kinë, vlerësojnë se rreth 250 milionë njerëz, ose 18% e popullsisë, u infektua me koronavirus në 20 ditët e para të muajit dhjetor. Kjo pasi Pekini hoqi thuajse të gjitha kufizimet që ishin në fuqi prej 3 vitesh.
Sipas Financial Times, vetëm të martën (20 dhjetor) u raportuan për 37 milionë raste të reja me koronavirus, ose 2.6% e popullsisë. Këto shifra u bënë të ditura nga Sun Yang, zëvendës drejtor i Qendrës Kineze për Kontrollin dhe Parandalimin e Sëmundjeve në një takim që zhvilloi me zyrtarë të tjerë të shëndetësisë.
Sun tha se shkalla e përhapjes së koronavirusit në vend ishte ende në rritje dhe vlerësoi se më shumë se gjysma e popullsisë në Pekin dhe Sichuan ishin të infektuar. Shpërthimi i rasteve të reja këtë muaj, erdhi menjëherë pasi Pekini liroi masat kufizuese si karantina e detyrueshme për personat që udhëtojnë.
Shifrat e Sun, të cilat u dhanë në një takim me dyer të mbyllura, janë në kontrast me të dhënat e nxjerra nga Komisioni Kombëtar i Shëndetit, i cili raportoi vetëm 62,592 raste me Covid gjatë së njëjtës periudhë. Javën e kaluar, Kina ndaloi publikisht përpjekjet për të llogaritur numrin e përgjithshëm të infeksioneve pasi autoritetet kufizuan testimin e koronavirusit.
Mungesa e informacionit të bërë publik nga Kina për valën e re të koronavirusit, ka bërë që Uashingtoni dhe Organizata Botërore e Shëndetësisë të ushtrojë “presion” mbi Pekinin që të jetë më transparent për regjistrimin e rasteve të reja, shifrat e personave që shtrohen në spital dhe statistika të tjera shëndetësore që janë vënë gjerësisht në dispozicion nga vende të tjera.
Në kryeqytetin kinez dhe qytete të tjera, vala e infeksioneve ka sjellë fluks pacientësh në spitale. Kjo ka bërë që të kufizohet numri i shtretërve në urgjencë dhe në shërbimin e kujdesit intensiv.
Po në këtë takim, Ma Xiaoëei, drejtor i Shërbimit të Kujdesit Shëndetësor, kërkoi që spitalet të rregullojnë dhomat e tyre të tejmbushura të urgjencës dhe të transferojnë pacientët në departamentet e spitalit.
Ai gjithashtu u kërkoi spitaleve të mëdha të marrin më shumë pacientë me simptoma të rënda dhe premtoi se rregullatorët nuk do t’i mbajnë ata përgjegjës për rritjen e shkallës së vdekshmërisë. Gjithashtu edhe vlerësimi i zyrtarëve kinezë se janë shënuar 250 milionë raste me koronavirus, ngrenë dyshime të mëtejshme në lidhje me regjistrimin e vdekjeve për shkak të COVID-19.
Vendi ka raportuar zyrtarisht vetëm tetë vdekje që nga 1 dhjetori. Zyrtarët kryesorë të shëndetësisë thanë këtë javë se kishin ngushtuar përkufizimin e vdekshmërisë nga Covid, çka solli dhe uljen e numrit të vdekjeve të regjistruara.
Megjithatë, krematoriumet në kryeqytetin kinez po përpiqen të përballojnë një fluks të shtuar të personave që kanë humbur jetën në spitale.
