Kryeministrja italiane, Giorgia Meloni, zhvilloi një takim të rëndësishëm me presidentin amerikan, Donald Trump, në Uashington. Ky takim shënon një moment kyç në marrëdhëniet mes dy vendeve, duke pasur në fokus çështje të rëndësishme ekonomike dhe diplomatike.
“Sfida që ne zgjedhim, ishim ndër të parët që e përmendëm dhe dje presidentja Von der Leyen e përsëriti, është mundësia e uljes së tarifave të tregtisë reciproke për produktet industriale në zero, me formulën, saktësisht “zero mbi zero”, tha kryeministrja italiane përpara takimit.
Meloni, e cila është liderja e parë evropiane që takohet me Trump pas shpalljes së tarifave të reja tregtare nga SHBA ndaj Bashkimit Evropian, synon të ndërtojë ura bashkëpunimi dhe të qetësojë tensionet tregtare. Në një deklaratë përpara takimit, ajo theksoi rëndësinë e një dialogu të hapur për të arritur një marrëveshje që do të përfitonte të dyja palët.
Nga ana tjetër, Trump e ka përshkruar Melonin si një “grua fantastike” dhe një lider të fuqishëm që po bën ndryshime të mëdha në Evropë. Takimi i tyre pritet të ndikojë jo vetëm në marrëdhëniet SHBA-Itali, por edhe në dinamikat më të gjera mes SHBA-së dhe Bashkimit Evropian.
Ky takim vjen në një kohë kur tensionet tregtare dhe tarifat doganore janë në qendër të vëmendjes globale. Meloni shpreson të arrijë një marrëveshje që do të lehtësojë tregtinë mes dy vendeve dhe do të mbështesë eksportet italiane në tregun amerikan.
Foto nga FoxNews
