Zëvendëspresidenti i Shteteve të Bashkuara, JD Vance, mbërriti mëngjesin e sotëm në Romë për një vizitë zyrtare, ku u prit nga kryeministrja italiane, Giorgia Meloni, në ambientet e Palazzo Chigi. Takimi u zhvillua në një atmosferë të ngrohtë dhe miqësore, duke reflektuar marrëdhëniet e ngushta mes dy vendeve.
Në qendër të bisedimeve ishin çështje të rëndësishme si forcimi i bashkëpunimit dypalësh, zhvillimet ndërkombëtare dhe negociatat tregtare mes SHBA-së dhe Bashkimit Evropian. Vance theksoi rëndësinë e partneritetit transatlantik dhe miqësisë së ngushtë me Italinë, duke e cilësuar këtë marrëdhënie si një shembull të bashkëpunimit të suksesshëm.
“E vlerësoj thellësisht miqësinë mes dy vendeve tona”, theksoi Vance
Nga ana e saj, kryeministrja Meloni e konsideroi takimin si një mundësi për të forcuar më tej lidhjet mes dy vendeve. Ajo shprehu krenarinë për marrëdhënien e privilegjuar mes Italisë dhe SHBA-së, duke theksuar rëndësinë e bashkëpunimit në sfidat globale.
Gjatë vizitës, Vance dhe Meloni diskutuan gjithashtu mbi situatën në Ukrainë, duke shprehur optimizëm për përparimin e negociatave që synojnë t’i japin fund konfliktit. Vizita e Vance vjen në një moment kritik për marrëdhëniet transatlantike dhe përpjekjet ndërkombëtare për stabilitet në Evropë.
Pas takimit, Vance pritet të marrë pjesë në një meshë të Pashkëve në Vatikan dhe të zhvillojë bisedime me përfaqësues të lartë të Selisë së Shenjtë, duke përfshirë Kardinalin Pietro Parolin.
Foto nga Google Images
