Autoriteti Kombëtar i Veterinarisë dhe Mbrojtjes së Bimëve (AKVMB) ka nisur sot një aksion të posaçëm verifikimi në terren për të kontrolluar gjendjen e shëndetit të kafshëve blegtorale në zonat e prekura nga zjarret e ditëve të fundit. Inspektorët dhe mjekët veterinarë po punojnë në bashkitë Delvinë, Finiq dhe Gramsh, ku zjarret kanë shkaktuar dëme të konsiderueshme në mjedis dhe në infrastrukturën bujqësore.
Sipas autoriteteve, kontrollet përfshijnë ekzaminime klinike të kafshëve, verifikim të kushteve të ushqimit dhe ujit, si dhe identifikimin e rasteve të mundshme të lëndimeve apo sëmundjeve të shkaktuara nga tymi dhe nxehtësia ekstreme. Për fermerët që kanë humbur rezervat ushqimore të bagëtive, po merren masa emergjente për sigurimin e furnizimit me bazë ushqimore.
AKVMB thekson se ky proces është thelbësor jo vetëm për mirëqenien e kafshëve, por edhe për sigurinë ushqimore të konsumatorëve. “Pas situatave të tilla ekstreme, rreziku i shfaqjes së sëmundjeve rritet, prandaj monitorimi duhet të jetë i shpejtë dhe i plotë,” – u shprehën përfaqësues të institucionit.
Dëmet nga zjarret në jug dhe qendër: humbje të konsiderueshme në blegtori e bletari, por edhe në ullishte e kullota.
Në fshatrat Tremul dhe Aliko janë djegur kullota dhe parcela me ullinj, por fatmirësisht nuk janë raportuar humbje në bagëti. Fermerët e zonës janë udhëzuar për masat që duhet të marrin në rast rreziku të ngjashëm në të ardhmen.
Në njësinë administrative Dhivër, zjarret kanë dëmtuar kullota dhe ullishte, ndërsa fermat që rrezikoheshin nga mungesa e ushqimit për bagëtitë u evakuuan në zona më të sigurta me kullota të gjelbra, larg flakëve. Në Sirakat, situata ka qenë më e rëndë: është djegur një stallë me 4 viça, si dhe dy parqe bletësh, përkatësisht me 140 dhe 57 zgjoje.
Raportet më të fundit tregojnë se Bashkia Delvinë është ndër zonat më të goditura. Dyshohet për djegien e një ferme me 25 krerë të imtash dhe 9 parqe bletësh me gjithsej 500 zgjoje. Në fshatrat Skëndërbegas, Arunas, Shëmbërdhenjë, Bletës dhe Kullollas janë evidentuar të djegur 9 krerë gjedh, 95 krerë të imtash dhe 50 zgjoje bletësh.
Grupet e punës vijojnë monitorimin e terrenit për evidentimin e plotë të dëmeve dhe mbështetjen e fermerëve të prekur. Kafshët e ngordhura po groposen sipas protokolleve veterinare; deri tani janë groposur gjithsej 39 krerë gjedh dhe të imta. Autoritetet pritet të publikojnë një raport të detajuar pas përfundimit të verifikimeve.
Megjithatë, ekspertët dhe organizatat e mjedisit theksojnë se masat reaguese nuk mjaftojnë. Shqipëria ka nevojë për plane parandaluese afatgjata që të përfshijnë krijimin e stacioneve rezervë të ushqimit për bagëtitë, sisteme të sigurta ujitjeje në raste emergjencash, si dhe trajnimin e fermerëve për menaxhimin e krizave natyrore. Përndryshe, çdo verë me temperatura ekstreme dhe rrezik zjarresh do të sjellë të njëjtat pasoja, duke e vendosur sektorin bujqësor e blegtoral në rrezik të vazhdueshëm.
Foto nga Google Images
Artikulli i përgatitur nga ACTVUSA
