Në një operacion të fundit të Byrosë Kombëtare të Hetimit (BKH), agjentët kanë kryer kontrolle të imtësishme në një nga bizneset e njohura të Elbasanit, me aktivitet në fushën e ndërtimit. Ky veprim është ndërmarrë me kërkesë të Prokurorisë së Posaçme, në kuadër të hetimeve mbi tenderat e dyshuar të përfituar nga bashkitë e Qarkut të Elbasanit.
Policia e Elbasanit ka konfirmuar se ka mbështetur BKH-në në zhvillimin e kontrolleve në një biznes të këtij qyteti. Megjithatë, burimet zyrtare kanë mbetur të rezervuara për të zbuluar emrin e subjektit ku janë ushtruar këto kontrolle. Gjatë operacionit, janë sekuestruar dokumente dhe pajisje elektronike, si pjesë e hetimeve në vijim.
Sipas burimeve, kontrollet kanë nisur në orët e para të mëngjesit, ku agjentët e BKH-së kanë sekuestruar dokumente, kompjuterë dhe celularët e punonjësve të biznesit. Ky operacion është pjesë e një hetimi më të gjerë mbi praktikat e dyshimta të prokurimeve publike në sektorin e ndërtimit, jo vetëm në Elbasan, por edhe në Tiranë dhe Durrës.
Në kuadër të këtyre hetimeve, agjentët kanë zbarkuar edhe në banesën e drejtorit të Ujësjellësit në Elbasan, Luan Tabaku, rreth orës 06:30 të mëngjesit të së enjtes. Ata gjithashtu po ushtrojne kontrolle të imtësishme në zyrat e ujesjellesit.
Agjentët e BKH-së, kanë sekuestruar fillimisht celularët e punonjësve.
Ende nuk dihet nëse ky veprim ka sjellë sekuestrime të tjera apo nëse Tabaku është subjekt i një hetimi më të thelluar.
Ky operacion ka shkaktuar reagime të shumta në qarqet politike dhe biznesore, duke ngritur pyetje mbi transparencën e prokurimeve publike dhe lidhjet mes sektorit privat dhe institucioneve shtetërore. Prokuroria e Posaçme pritet të japë më shumë detaje mbi ecurinë e hetimeve në ditët në vijim.
Foto nga Google Images
