Të nderuar qytetarë,
Kemi kënaqësinë t’ju njoftojmë se Alternativa shqiptare do të organizojë kuvendin e saj të rregullt më 6 maj.
Jemi krenarë që do të jetë kuvendi më i madh dhe më madhështor i mbajtur ndonjëherë nga një parti shqiptare në Mal të Zi. I organizuar sipas kapaciteteve dhe kritereve më të larta të karakterit evropian dhe perëndimor, ky kuvend do të jetë me pjesëmarrje rekord të delegatëve nga i gjithë vendi, duke filluar nga Rozhaja, Plava, Gucia, Podgorica, Malësia, Kraja, Ulqini dhe çdo cep tjetër ku jetojnë shqiptarët.
Kuvendi, më i madhi i organizuar ndonjëherë në këto troje, do të nderohet edhe me praninë e shumë zyrtarëve nga Mali i Zi, Shqipëria, Kosova, Maqedonia e Veriut si dhe partnerët tanë evropianë.
Alternativa shqiptare, si subjekti i vetëm politik shqiptar me degë dhe këshilltarë në të gjitha kuvendet e komunave me popullsi shqiptare, prej vitesh ka punuar për të mirën e të gjithë shqiptarëve duke ngritur standardin e tyre të jetesës dhe të punës dhe duke arritur nivelet më të larta zhvillimore në vend dhe rajon.
Në këtë drejtim, Alternativa shqiptare, si drejtuese dhe si forca kryesore e Forumit shqiptar, do të vazhdojë me zhvillimin dhe avancimin e statusit dhe të drejtave të shqiptarëve në Mal të Zi.
Vetë forca e Alternativës shqiptare qëndron tek njerëzit dhe anëtarët e partisë dhe këtë e dëshmon puna e kryetarit të komunës së Tuzit, ministrit, drejtorave të administratave shtetërore, drejtorëve të ndërmarrjeve, sekretarëve dhe shumë anëtarëve të tjerë të vlefshëm që janë të fokusuar në faktorizimin dhe forcimin e pozitës së shqiptarëve në nivel lokal dhe shtetëror. Rezultati më i mirë i punës sonë është situata aktuale ku shqiptarët përfaqësohen më mirë se kurrë me standarde më të mira, me të drejta të plota dhe me punësime si asnjëherë më parë.
Të gjitha këto vlera do ta bëjnë kuvendin e 6 majit një festë të bukur të demokracisë, përgjegjësisë dhe punës së përkushtuar në të mirë të qytetarëve.
Gjithmonë në shërbim të qytetarëve – gjithmonë në drejtim të avancimit dhe forcimit të shqiptarëve në Mal të Zi.
