Kryeministri Albin Kurti ka thënë se ky program parashihet të arrijë deri në 100 milionë euro.
“Në shkurt të 2021-s patëm premtuar qeverisje të drejtë dhe demokratike, politika të reja që do të ndryshojnë imazhin. Dritarja për Investime e lehtëson financimin e projekteve dhe ua mundëson bizneseve të mërgatës që të zgjerohen edhe në Kosovë. Do të mundësohet garantimi i kredive investuese deri në 3 milionë euro, ndërsa e tërë dritarja parashihet të arrijë deri në 100 milionë euro. Kemi shumë raste ku bashkatdhetarët tanë po kthehen për të investuar në Kosovë, për të punuar këtu, sepse Kosova ofron kushte të mirë”, ka deklaruar ai.
Ministri i Financave, Hekuran Murati ka theksuar se përmes kësaj dritare do të mundësohet rritja e investimeve të diasporës. Ai ka bërë të ditur se Qeveria do t’i ofrojë 8 milionë euro në këtë iniciativë, ndërsa Fondi Kosovar për Garanci Kreditore do t’i ndajë dy milionë euro.
Ambasadori i Shteteve të Bashkuara të Amerikës, Jeffrey Hovenier ka thënë se kur ndërmarrësit nga diaspora kthehen në vend, sjellin më të mirën këtu.
