Kreu i Partisë Demokristiane, Nard Ndoka, ka artikuluar akuza të forta ndaj SPAK-ut, duke e cilësuar atë si një institucion që po përdoret politikisht dhe pa standarde të drejta. Në intervistën e dhënë në studion e “Off the Record” me Andrea Dangllin, Ndoka u shpreh se ky institucion ka krijuar klimë frike dhe pasigurie tek administrata dhe politika.
“SPAK për fat të keq është kthyer si gogol, si dikur që vendosje një surrat në arë për të trembur zogjtë. Kjo ka krijuar terror dhe frikë te administrata, nga fakti se mund të të marrin edhe kot, të fusin brenda dhe të mbajnë pa prova. Nuk ka standard të drejtë,” tha Ndoka.
Ai theksoi se nuk është kundër hetimit të politikanëve, përkundrazi e cilësoi të domosdoshëm faktin që asnjë nuk gëzon imunitet nga ligji. Por sipas tij, mënyra sesi SPAK ka vepruar në rastet e Sali Berishës dhe Ilir Metës është tregues i keqpërdorimit të këtij institucioni.
“Berisha e Meta duhet të jenë ose në burgim, ose të lirë. Ky paraburgim pa prova e pa fakte është kulmi i keqpërdorimit të SPAK-ut. Nëse ka prova bindëse, dënimi duhet të jepet brenda pak muajsh, jo të mbahet një vit arrest shtëpie me zvarritje,” u shpreh Ndoka.
Duke bërë një dallim, ai shtoi se çështja e Erion Veliajt trajtohet ndryshe dhe se nuk është kundër hetimit të asnjë politikani, por kundër përdorimit të drejtësisë si “instrument goditës politik”.
Deklaratat e tij vijnë në të njëjtën ditë kur Këshilli i Lartë i Prokurorisë hapi garën për kreun e ri të SPAK, pasuesin e Altin Dumanit, çka e bën debatin për të ardhmen e këtij institucioni edhe më të nxehtë në skenën politike shqiptare.
“SPAK për fat të keq është kthyer si gogol si dikur që vendosje një surrat në arë për të trembur zogjtë. Kjo është ka një terror e frikë tek administrata për faktin se të marrin edhe kot të fusin edhe brenda dhe të mbajnë pa prova, vënë dhe gjoba e veprime të ndryshme. Nuk ka standard të drejtë. Se unë nuk jam kundër të hetohet çdo politikan dhe i vetmi lajm i mirë është që politika nuk e ka këtë imunitet. Çdo politikan që ka pas lidhje me taksat e shqiptarëve të hetohet”.
“Unë që kam vërejtje thelbësore është ky standard; që Berisha e Meta duhet të jenë o në burgim, o të lirë. Kjo në paraburgim pa prova e fakte është kulmi me e keqpërdor SPAK-un në mënyrë vulgare. Nëse ka prova bindëse është normale jo të mbahet një vit dhe pastaj të kontrollohet shtëpia. Nëse e ndalon dhe ke prova duhet ta dënosh në 3 mujorin e parë dhe jo një vit arrest shtëpie e zvarritje. Me Veliajn ndryshon puna. Nuk jam kundra hetimit të politikanëve se prandaj e kemi votuar por jo të përdoret si instrument politik, goditës”.
Foto nga Google Images
Artikulli i përgatitur nga ACTVUSA
