Biseda mes Sokol Ballës dhe Edi Ramës në intervistën e fundit ka hapur një diskutim të ri mbi qarkullimin politik brenda Partisë Socialiste. Në bisedën mes tyre, Rama e pranoi hapur atë që ka thënë edhe më parë: se dikur ai ka qenë “biri politik” që zëvendësoi “babain e tij politik”, Fatos Nano. Por kur Balla e çoi bisedën në pikën aktuale – 20 vjet pas marrjes së drejtimit të PS-së – përgjigjet e Ramës nxorën në pah një realitet që, sipas tij, vazhdon të jetë bosh.
Kur Balla e pyeti: “Pas 20 vitesh, ju jeni babai politik i PS-së. E keni apo s’e keni ‘birin politik’ që mund t’ju zëvendësojë?” — Rama u përgjigj prerë:
“S’e kam një bir që të më ‘vrasë’ për momentin… Jo, s’e kam një bir politik që të më vrasë për momentin flas.”
Shprehja “të më vrasë”, e ritheksuar disa herë gjatë intervistës, qe ka te beje me zëvendësimin politik — me atë figurë të brendshme që natyrshëm do të duhej të merrte drejtimin e partisë kur vjen koha. Rama e pranoi qartë se një figurë e tillë, sipas tij, sot nuk ekziston.
Çfarë nënkupton mungesa e “birit politik”?
Shpesh, mungesa e një pasardhësi nuk është rastësi, por zgjedhje. Ka liderë që hezitojnë të krijojnë figura të forta pranë vetes nga frika se mos ata “i zëvendësojnë shumë shpejt”. Kjo kthehet në një cikël të mbyllur ku askush nuk ngrihet, askush nuk sfidon, askush nuk rritet.
Deklarata e Ramës vë në pah një fenomen të njohur në politikën shqiptare: mungesën e brezave të përgatitur për të marrë drejtimin. Ndryshe nga partitë ku lidershipi ndërtohet në mënyrë të vazhdueshme, brenda PS-së – sipas vetë kreut të saj – nuk ka një pasardhës të formuar plotësisht, të aftë të marrë stafetën pas tij.
Kjo nënkupton mungesë të një strukture të qartë pasuese; mospromovim të figurave të forta brenda partisë; një lidership të gjatë që nuk ka prodhuar alternativë reale.
Në politikë, të kesh një “bir” politik nuk është dobësi, por shenjë stabiliteti. Tregon se partia ka një vizion për të ardhmen dhe po rrit njerëz që nesër mund të marrin drejtimin. Rama, duke thënë se nuk ka një pasardhës, ekspozon një boshllëk që ndikon jo vetëm PS-në, por edhe skenën politike shqiptare në tërësi.
A është kjo një pranim apo një paralajmërim?
Për disa, deklarata e Ramës tingëllon si pranim i sinqertë: pas dy dekadash në krye, ai nuk sheh askënd të gatshëm për t’i marrë vendin. Për të tjerë, është një paralajmërim i heshtur se tranzicioni i lidershipit në PS, kur të vijë dita, mund të jetë i vështirë, i ngadalshëm dhe potencialisht i përçarë.
Në fakt, përgjigja e tij përsëritet tri herë: “S’e kam.”
Kjo e bën deklaratën edhe më të fortë, edhe më simbolike.
Ja nje pjese nga intervista:
Sokol Balla: Më lejoni para se të kalojmë te pikat e tjera. Në fjalimin tuaj e pranuat se ai kishte qenë babai juaj politik, siç edhe pranuat që ju ishit i biri që politikisht vrau babain për t’i zënë atij vendin
Edi Rama: Këtë e kam thënë edhe herë të tjera.
Sokol Balla: Pyetja ime është që tani që ju jeni kryetar i PS që prej 25 tetorit 2005, kam patur fatin t’ju bëj intervistën e parë atëherë menjëherë pas kongresit, pra pas 20 vitesh ju jeni babai politik i PS-së.
Edi Rama: S’e kam një bir që të më ‘vrasë’ për momentin.
Sokol Balla: Keni apo s’keni.
Edi Rama: Jo s’e kam një bir politik që të më vrasë për momentin flas.
Sokol Balla: Pse ku është?
Edi Rama: S’e kam.
Foto nga Google Images
Artikulli i përgatitur nga ACTVUSA
