Në një atmosferë solemniteti dhe reflektimi të thellë shpirtëror, Papa Françesku u shfaq në publik këtë të dielë të Pashkës, duke dhënë bekimin tradicional “Urbi et Orbi” për mijëra besimtarë të mbledhur në Sheshin e Shën Pjetrit në Vatikan.
Pavarësisht sfidave shëndetësore të kohëve të fundit, Ati i Shenjtë u paraqit para turmës, duke përcjellë një mesazh shprese dhe paqeje. Me një zë të qetë, ai uroi besimtarët: “Të dashur vëllezër dhe motra, Pashkë të lumtura dhe të bekuara”.
Në mesazhin e tij, Papa Françesku u ndal te luftërat dhe antisemitizmi, duke bërë thirrje për çarmatim të vërtetë dhe për ndihmë ndaj popullsive të prekura nga konfliktet. Ai shprehu shqetësimin e tij për situatën në Izrael dhe Palestinë, duke kërkuar ndalimin e dhunës dhe lirimin e pengjeve.
“Sa vullnet për të vdekur shohim çdo ditë në konfliktet e shumta që prekin pjesë të ndryshme të botës! Sa dhunë shohim shpesh edhe në familje, ndaj grave apo fëmijëve! Sa përbuzje ndihet ndonjëherë ndaj më të dobëtve, të margjinalizuarve, mërgimtarëve! Do të doja që në këtë ditë t’i kthehemi shpresës dhe besimit te të tjerët, edhe tek ata që nuk janë afër nesh ose që vijnë nga vende të largëta me zakone, mënyra jetese, ide dhe zakone të ndryshme nga ato më të njohurat për ne, sepse të gjithë jemi fëmijë të Zotit. Jam i shqetësuar për klimën në rritje të antisemitizmit që po përhapet në të gjithë botën. Në të njëjtën kohë, mendimet e mia shkojnë te njerëzit dhe në veçanti te komuniteti i krishterë i Gazës, ku konflikti i tmerrshëm vazhdon të gjenerojë vdekje dhe shkatërrim dhe të shkaktojë një situatë humanitare dramatike dhe të poshtër. Paqe!”, ka shkruar Papa në Urbi et Orbi të lexuar nga Imzot Diego Ravelli.
Pas bekimit, Papa bëri një xhiro me papamobile mes besimtarëve, duke përshëndetur ata që kishin ardhur për të ndjekur këtë moment të rëndësishëm të festës së Pashkëve.
Ky kremtim i Pashkëve në Vatikan mbetet një simbol i unitetit, besimit dhe shpresës, duke sjellë një mesazh të fortë për botën në një kohë sfidash dhe pasigurie.
Foto nga Google Images
