Presidenti i Shteteve të Bashkuara, Donald Trump, ka bërë deklarata të forta lidhur me luftën në Ukrainë, duke fajësuar tre liderë kryesorë për konfliktin dhe pasojat e tij tragjike. Në një intervistë të fundit, Trump theksoi se Vladimir Putin, Joe Biden dhe Volodymyr Zelenski mbajnë përgjegjësi për miliona jetë të humbura në këtë luftë të përgjakshme.
Presidenti Trump e cilësoi vendimin e Zelenskit për të sfiduar Rusinë si një “budallallëk”, duke argumentuar se Ukraina nuk mund të përballet me një vend që është “20 herë më i madh”. Ai shtoi se konflikti është përshkallëzuar për shkak të kërkesave të vazhdueshme të Zelenskit për ndihmë ushtarake nga Perëndimi. Kjo deklarate erdhi pasi Zelenski kerkoi te blinte raketa te tjera.
Nga ana tjetër, Trump kritikoi edhe ish-presidentin e SHBA-së, Joe Biden, duke thënë se ai nuk ka pasur një strategji të qartë për të menaxhuar situatën dhe për të parandaluar përshkallëzimin e konfliktit. “Biden nuk e kishte idenë se çfarë po bënte,” tha Trump, duke e renditur atë si një nga përgjegjësit kryesorë për situatën.
“Ju nuk mund të filloni një luftë kundër një vendi njëzet herë më i madh dhe më pas shpresoni se dikush do të vijë dhe do t’ju japë disa raketa. Miliona njerëz kanë vdekur për shkak të tri personave. Le të themi se numri një është Putini, numri dy Biden që nuk e kishte idenë se çfarë po bënte, dhe numri 3 Zelensky. Ky i treti gjithmonë duke kërkuar të blejë raketa“, tha Trump
Trump gjithashtu theksoi se konflikti duhet të marrë fund sa më shpejt, duke bërë thirrje për një zgjidhje diplomatike që do të ndalonte humbjen e mëtejshme të jetëve. Ai e quajti luftën një tragjedi të panevojshme dhe shprehu shqetësimin për ndikimin e saj global, përfshirë edhe shpenzimet e mëdha që SHBA ka mbajtur për të mbështetur Ukrainën.
Deklaratat e Trump kanë ngjallur reagime të ndryshme, duke përfshirë kritika dhe mbështetje nga figura të ndryshme politike dhe publike.
Foto nga FoxNews
