Presidenti i Republikës së Shqipërisë, Z. Bajram Begaj, kryesoi delegacionin shqiptar në ceremoninë solemne të inaugurimit të Papa Leoni XIV, e mbajtur në Vatikan. Ngjarja madhore fetare dhe diplomatike mblodhi personalitete të shquara nga e gjithë bota, përfshirë krerë shtetesh, përfaqësues të lartë të kishave dhe institucioneve ndërkombëtare, në një atmosferë të mbushur me solemnitet dhe shpresë për një kapitull të ri në udhëheqjen e Kishës Katolike.
Pjesëmarrja e Presidentit Begaj në këtë ceremoni përforcon marrëdhëniet historike të miqësisë dhe respektit të ndërsjellë ndërmjet Shqipërisë dhe Selisë së Shenjtë. Në fjalët e tij për mediat ndërkombëtare, Presidenti theksoi rëndësinë që Shqipëria i kushton dialogut ndërfetar, bashkëjetesës paqësore dhe rolit të Kishës në promovimin e vlerave njerëzore dhe universale.
“I lumtur që isha pjesë e ceremonisë së inaugurimit të Papa Leoni XIV në Selinë e Shenjtë, Vatikan. Le të frymëzohemi nga misioni i Papa Leoni XIV për paqen dhe ndërtimin e urave të dialogut për të përballuar bashkë sfidat dhe pasiguritë. Besoj se Papa Leoni XIV do të sjellë paqe, harmoni dhe unitet në botë. Shqipëria pret me padurim të vazhdojë marrëdhënien e ngrohtë e të sinqertë me Vatikanin”, shkruan presidenti.
Ceremonia e inaugurimit shënon fillimin zyrtar të papatit të Papa Leoni XIV, një figurë që pritet të sjellë një frymë të re në drejtimin shpirtëror të miliona besimtarëve katolikë në mbarë botën. Pritet që në ditët në vijim të ketë zhvillime edhe në drejtim të forcimit të marrëdhënieve diplomatike dhe kulturore mes Shqipërisë dhe Selisë së Shenjtë, në frymën e respektit të ndërsjellë dhe trashëgimisë shpirtërore që i lidh prej kohësh.
Foto nga profili i President Bajram Begaj
