Teksas, 11 korrik 2025 – Presidenti i Shteteve të Bashkuara, Donald Trump, mbërriti këtë pasdite në Teksas, në një vizitë zyrtare në zonat e goditura rëndë nga përmbytjet shkatërrimtare që kanë tronditur vendin. I shoqëruar nga bashkëshortja e tij, Melania Trump, presidenti zhvilloi një vizitë disaorëshe në zonat më të goditura, ku takoi zyrtarë lokalë dhe familje të prekura nga fatkeqësia.
Stuhitë e ditëve të fundit kanë shkaktuar një krizë të thellë humanitare, duke marrë jetën e të paktën 135 personave, ndërsa mijëra të tjerë janë evakuuar nga shtëpitë e tyre.
Presidenti Trump u prit nga guvernatori i Teksasit dhe drejtues të agjencive të emergjencës, me të cilët zhvilloi një takim të mbyllur në qendrën e koordinimit të krizave. Në një deklaratë për mediat, Presidenti theksoi se qeveria federale është “e angazhuar plotësisht për të ndihmuar Teksasin dhe çdo qytetar të prekur nga kjo tragjedi”, duke premtuar mbështetje të menjëhershme për rikuperim dhe rindërtim.
“Zemrat tona janë me familjet që kanë humbur të dashurit e tyre. Kjo është një tragjedi kombëtare, por si gjithmonë, amerikanët ngrihen së bashku në kohë krize. Qeveria federale do të qëndrojë përkrah qytetarëve të Teksasit deri në fund. Nuk kam parë kurrë diçka të tillë më parë. Është e vështirë të besohet shkatërrimi.. Pemë 100-vjeçare të shkulura nga rrënjët… shumë fëmijë janë të zhdukur.” u shpreh Trump, i cili vizitoi edhe një nga kampet e përkohshme të ngritura për familjet e shpërngulura.
Zonja e Pare, Melania Trump shprehu ngushëllimet e saj për familjet e viktimave: “Ngushëllimet e mia më të thella për të gjithë prindërit që humbën fëmijët e tyre të vegjël. Ne vajtojmë me ju. I gjithë vendi ynë vajton me ju”, theksoi ajo.
Vizita e Presidentit Trump vjen në një moment delikat, kur autoritetet përballen me sfida të mëdha në ofrimin e ndihmës bazë, si ushqim, ujë të pijshëm dhe strehim të sigurt për dhjetëra mijëra të prekur.
Vizita e tij erdhi në një klimë të ndezur polemikash. Administrata Trump është kritikuar ashpër për shkurtimet buxhetore në sistemet e paralajmërimit të hershëm dhe kapacitetet e shërbimeve emergjente, përfshirë Agjencinë Federale për Menaxhimin e Emergjencave (FEMA). Kur u pyet nga gazetarët nëse synon ende ta shfuqizojë FEMA-n, siç kishte paralajmëruar më herët, Trump tha se “nuk është koha e duhur për këtë debat”, duke theksuar se menaxhimi i fatkeqësive duhet të mbetet “në dorë të shteteve”.
Ndërkohë, Sekretarja e Sigurisë Kombëtare, Kristi Noem, reagoi përmes një postimi në Platformën X, ku deklaroi se “përgjigja federale ishte e shpejtë dhe efektive, në koordinim me autoritetet vendore”. Megjithatë, në terren, shumë qytetarë dhe organizata humanitare raportojnë mungesa në ndihma, komunikim dhe mbështetje konkrete. Ndërsa vendi përballet me pasojat e një tragjedie të përmasave të mëdha, pyetjet për përgjegjësinë dhe përgatitjen ndaj fatkeqësive natyrore mbeten të hapura.
Foto nga Google Images
Artikulli i përgatitur nga ACTVUSA
