Presidentja e Kosovës, Vjosa Osmani, ka përgëzuar nënshkrimin e Planit të Paqes për Gazën, duke e cilësuar këtë ngjarje si një moment përcaktues për paqen në Lindjen e Mesme. Në një postim në platformën X, Osmani theksoi se ky plan ofron një mundësi reale për t’i dhënë fund viteve të vuajtjeve dhe pasigurisë, duke u dhënë familjeve mundësinë për të jetuar në siguri, dinjitet dhe liri.
Ajo vlerësoi lidershipin e guximshëm të Presidentit të SHBA-së, Donald Trump, dhe angazhimin e të gjithë udhëheqësve që punuan pa u lodhur drejt këtij qëllimi. Presidentja Osmani gjithashtu falënderoi ndërmjetësuesit nga Katari, Egjipti dhe Turqia për angazhimin e tyre të vazhdueshëm për paqen dhe për rolin e tyre kyç në arritjen e këtij progresi historik.
Ky hap i rëndësishëm është parë si një mundësi për të sjellë një periudhë të re paqeje dhe stabiliteti në rajon, duke u dhënë shpresë popujve të Izraelit dhe Palestinës për një të ardhme më të mirë.
“Sot shënohet fillimi i një agimi të ri dhe një kapitulli të rëndësishëm për paqen në Lindjen e Mesme me nënshkrimin e Planit të Paqes në Gaza. Nëpërmjet lidershipit vendimtar dhe të guximshëm të Presidentit Donald Trump dhe angazhimit të të gjithë udhëheqësve që punuan pa u lodhur drejt këtij qëllimi, ky moment shprese i shumëpritur është bërë realitet. Kjo marrëveshje ofron një rrugë për t’i dhënë fund viteve të vuajtjeve dhe pasigurisë, duke u dhënë familjeve të panumërta mundësinë për të jetuar në siguri, dinjitet dhe liri. Ne i nxisim të gjitha palët të shfrytëzojnë këtë mundësi dhe të zbatojnë plotësisht planin e paqes të @POTUS”, ka shkruar Osmani.
Foto nga Google Images
Artikulli i përgatitur nga ACTVUSA
