Kryetari i Partisë Demokratike, Sali Berisha, mbajti fjalimin e tij në foltoren e ngritur nga PD para Kryeministrisë, duke u ndalur te zhvillimet e fundit që lidhen me pezullimin e ministres së Infrastrukturës, Belinda Balluku, dhe akuzat ndaj saj.
Në fjalën e tij, Berisha komentoi edhe takimin 7-orësh midis kryeministrit Rama dhe Ballukut, që u zhvillua pak ditë më parë në Kryeministri, menjëherë pasi GJKKO e pezulloi nga detyra. Berisha pretendoi se gjatë këtij takimi ka pasur tensione dhe përplasje mes Ramës dhe Ballukut, duke përshkruar një version të ngjarjeve.
“Këta kanë ndejtur këtu 7 orë. Hajduti është qenia më pa moral në botë. Por muret kanë vesh,” u shpreh Berisha, duke shtuar se Rama i kishte kërkuar Ballukut të jepte dorëheqjen. “Jo, nuk e jap dorëheqjen, se pastaj shkoj në burg,” është varianti që Berisha i atribuoi Ballukut. Më tej, ai deklaroi se në dosje janë bërë publike mesazhe që, sipas tij, rëndojnë jo vetëm Ballukun, por edhe kryeministrin. “Rama i ka thënë: çfarë t’u bëj mesazheve të tua?”, u shpreh Berisha se i ishte drejtuar kreu i qeverisë Ballukut. Berisha tha se Balluku i ka kërkuar Ramës që rasti i saj t’i drejtohej Gjykatës Kushtetuese nga qeveria, por se kryeministri fillimisht kishte refuzuar. Sipas tij, vendimi i sotëm i Ramës për ta çuar çështjen në Kushtetuese nuk ka të bëjë me mbrojtjen e Ballukut, por “vetëm me interesat e tij personale”. “Ai që mendon se Rama po e bën për njerëzi ndaj Ballukut, mendon një budallallëk. E bën vetëm për veten. Sepse vetë nuk shkonte dot, nuk ka pasur kombi hajdut më ordiner se Balluku,” tha Berisha.
