Tiranë – Qeveria shqiptare ka miratuar një paketë të rëndësishme ndryshimesh në Rregulloren e Zhvillimit të Territorit, e cila synon të vendosë rregulla më të qarta dhe më të rrepta mbi lejet e ndërtimit, menaxhimin e hapësirave publike dhe ndërhyrjet në zonat rurale. Vendimi i Këshillit të Ministrave vjen si përgjigje ndaj shqetësimeve të vazhdueshme për abuzimet me ndërtimet, bllokimin e rrugëve të kalimit, si dhe zvarritjet burokratike për investitorët që operojnë brenda kuadrit ligjor.
Një ndër pikat më të rëndësishme të ndryshimeve është ndalimi i prerë i vendosjes së trarëve, rrethimeve apo çdo pengese tjetër në rrugët e kalimit apo lidhjet me hapësira publike, madje edhe në ato raste kur këto servitute nuk janë të regjistruara zyrtarisht. Kjo masë synon të mbrojë të drejtën e qytetarëve për të lëvizur lirshëm në hapësirat e përbashkëta dhe për të shmangur përvetësimin arbitrar të pronave publike apo hyrjeve kolektive.
Po ashtu, ndryshimet e reja forcojnë kriteret për marrjen e lejeve të ndërtimit, duke vendosur standarde më rigoroze për projektet që zhvillohen në zona urbane dhe rurale, si dhe për përputhshmërinë e tyre me planet vendore të zhvillimit. Nga ana tjetër, për investitorët që përmbushin detyrimet ligjore dhe planifikojnë projekte në përputhje me interesin publik, procedurat do të thjeshtohen dhe përshpejtohen, për të nxitur zhvillimin e qëndrueshëm dhe transparent.
Kjo nismë e re vjen në një moment kur debati publik për mbrojtjen e hapësirave të përbashkëta është intensifikuar, veçanërisht në qytete si Tirana, ku ndërhyrjet private shpesh kanë kufizuar aksesin në rrugë, lulishte apo trotuare. Qeveria thekson se zbatimi strikt i këtyre ndryshimeve do të monitorohet nga strukturat përkatëse dhe shkeljet do të ndëshkohen në përputhje me ligjin.
Me këtë vendim, autoritetet synojnë të rikthejnë balancën mes interesit privat dhe atij publik, të rrisin transparencën në procesin e zhvillimit të territorit dhe të garantojnë një mjedis të jetueshëm dhe funksional për të gjithë qytetarët.
Ky është një zhvillim që me të drejtë ka ngjallur zemërim, pasiguri dhe revoltë në shumë biznese e qytetarë që ndihen të goditur padrejtësisht nga veprimet e fundit të qeverisë. Për një dekadë, pushteti vendor – në shumë raste përmes zyrtarëve të korruptuar – ka lëshuar leje, miratime dhe “letra” formalisht të rregullta për ndërtime apo veprimtari tregtare në hapësira publike. Në shumicën e rasteve, këto biznese kanë paguar taksa, qera dhe tarifa për leje nga vetë bashkitë. Tani, kur qeveria ka vendosur t’i shpallë këto veprime të paligjshme dhe t’i shembë objektet apo t’i nxjerrë jashtë hapësirave, pyetja është shumë e thjeshtë: Ku ishte shteti gjatë këtyre 10 viteve?
Përgjegjësia nuk mund t’u bjerë sot vetëm qytetarëve apo biznesit të vogël që ka vepruar brenda sistemit të ndërtuar nga vetë institucionet shtetërore. Nuk është thjesht një çështje ndërtimesh të paligjshme – është një krizë e thellë e mosfunksionimit të shtetit ligjor, ku njëra dorë e shtetit legalizonte, ndërsa tjetra tani shemb dhe ndëshkon. Mungesa e transparencës, standardeve të barabarta dhe drejtësisë është ajo që po e acarojnë opinionin publik. Në vend që të luftohen shkaktarët – zyrtarët që firmosën leje për përfitime personale – po ndëshkohen viktimat e sistemit të çoroditur vetë nga shteti. Dhe ky është një mesazh i rrezikshëm për shoqërinë: që ligji zbatohet me vonesë dhe në mënyrë selektive, jo si mbrojtje, por si dënim.
Foto nga Google Images
Artikulli i përgatitur nga ACTVUSA
