Kryeministri Edi Rama, në një intervistë të fundit, është shprehur prerë se koncepti i bashkimit kombëtar mes Shqipërisë dhe Kosovës nuk ka asnjë bazë reale jashtë kornizës së Bashkimit Evropian. “Bashkimi kombëtar, sipas meje, është vetëm bashkimi me Evropën dhe asgjë tjetër. Çdo gjë tjetër është përrallë që gjithkush mund t’ia tregojë vetes, por nuk ka asnjë shans që ta shohë të realizuar në realitet”, tha ai.
Rama shtoi se jetojmë në shekullin XXI dhe se nuk mund të mendojmë me formula të shekujve të kaluar, duke i quajtur fantazi çdo ide të bashkimit kombëtar jashtë BE-së. Por ndërsa ai e sheh të ardhmen vetëm në Bruksel, shumë qytetarë e shohin këtë si një përçmim të aspiratave historike dhe shpirtërore për një bashkim më të gjerë shqiptar. Ironia qëndron tek fakti se Kryeministri, që shpesh prezantohet si “lider vizionar”, në këtë rast del si njeriu që sheh bashkimin vetëm si një tabelë burokratike në korridoret e Evropës, ndërsa idealin shekullor të shqiptarëve e redukton në një “përrallë për fëmijë”.
“Është e pamundur të përparohet në asnjë lloj drejtimi në këtë aspekt pa krijuar besim dhe simpati të plotë ndërkombëtare. Kjo nuk bëhet se duam ne, por bëhet nëse ne kemi të gjithë miqtë e mjaftueshëm dhe aleancat e mjaftueshme për t’ia dalë. Në këtë aspekt, fjala më e butë që mund të thuhet është se nuk ka asnjë progres. S’ka asnjë progres në aspektin e zgjerimit dhe forcimit të miqësive ndërkombëtare të Kosovës.
Bashkimi kombëtar, sipas meje, është vetëm bashkimi me Evropën dhe asgjë tjetër. Çdo gjë tjetër është përrallë që gjithkush mund t’ia tregoj vetes por nuk ka asnjë shans që ta sheh të realizuar në realitet. Jetojmë në shekullin 21 dhe nuk mund të mendojmë në shekullin 21 me formula të shekullit 20 dhe lëre pastaj të shekullit 19 apo më përpara. Për mua, nëse flasim për bashkim kombëtar, flasim për Bashkim Evropian. Nëse flasim për bashkim kombëtar jashtë Bashkimit Evropian, jemi duke folur me vete dhe për vete por as për vete jo sepse është tërësisht një fantazi që s’ka lidhje me realitetin”, tha Rama.
Ironia është therëse: ndërsa gjenerata të tëra shqiptarësh kanë ëndërruar për një bashkim kombëtar real me Kosovën, Kryeministri e redukton atë në një dosje burokratike të Brukselit. Ndërsa populli shikon bashkimin si kauzë të gjakut, historisë dhe gjuhës, Rama e sheh thjesht si një proces burokratesh në korridoret e BE-së. Në këtë kontrast, idealet shqiptare duken të “vjetruara”, vetëm sepse nuk përputhen me axhendën e tij politike, që shpesh duket më e lidhur me foton protokollare në Evropë sesa me aspiratat e kombit.
Foto nga Google Images
Artikulli i përgatitur nga ACTVUSA
