TIRANË – Kjo e hënë, 9 mars 2026, u shoqërua me përplasje të forta politike në Shqipëri, pasi kryeministri Edi Rama reagoi publikisht ndaj kërkesës së Prokurorisë së Posaçme (SPAK) për kufizimin e lirisë së ish-zëvendëskryeministres dhe deputetes socialiste Belinda Balluku.
Gjatë një fjalimi në mbledhjen e grupit parlamentar të Partisë Socialiste, Rama kritikoi ashpër SPAK dhe Gjykatën e Posaçme (GJKKO), duke deklaruar se kërkesa për arrestimin e Ballukut nuk është e mbështetur në prova të forta. Sipas tij, për të kërkuar një masë të rëndë si arresti, prokuroria duhet të paraqitet në Kuvend “e armatosur me prova dhe fakte”, dhe jo me indicie apo dëshmi të pakonfirmuara.
Kryeministri theksoi se në materialet e dorëzuara nga SPAK ka shumë dokumente dhe materiale administrative, të cilat sipas tij nuk provojnë një shkelje penale. Ai madje ironizoi dosjen voluminoze të hetimit, duke e quajtur atë një grumbull dokumentesh që nuk përbëjnë prova konkrete për një akuzë penale.
PS kundër heqjes së imunitetit
Në të njëjtën kohë, shumica socialiste në Kuvend vendosi të mos japë autorizimin për arrestimin e deputetes Belinda Balluku. Vendimi u mbështet nga raporti i anëtarëve socialistë në Këshillin e Mandateve, të cilët argumentuan se nuk ekzistonin kushtet ligjore për një masë sigurie më të rëndë, si arresti në burg apo në shtëpi.
SPAK kishte kërkuar heqjen e imunitetit të Ballukut në kuadër të një hetimi për veprën penale “shkelje e barazisë së pjesëmarrësve në tendera apo ankande publike”. Prokuroria dyshon se kjo vepër mund të jetë kryer disa herë gjatë kohës kur ajo drejtonte Ministrinë e Infrastrukturës dhe Energjisë.
Rama: Balluku do të përballet me drejtësinë me avokatët e saj
Megjithëse e kritikoi kërkesën e SPAK, Rama deklaroi se Balluku do të përballet me procesin gjyqësor dhe se në këtë betejë ligjore ajo do të ketë në krah vetëm avokatët e saj. Ai gjithashtu vlerësoi punën e saj gjatë viteve në qeveri dhe tha se drejtësia duhet të hetojë çdo pistë, por gjithmonë mbi bazën e provave.
Reagimi i opozitës
Vendimi i mazhorancës për të mos lejuar arrestimin e Ballukut shkaktoi reagime të forta nga opozita. Kryetari i Partisë Demokratike, Sali Berisha, deklaroi se me këtë veprim qeveria po sfidon drejtësinë dhe po vendos veten mbi ligjin.
Sipas opozitës, çështja Balluku është një test për funksionimin e reformës në drejtësi dhe për raportin mes politikës dhe institucioneve të pavarura të drejtësisë në vend.
“Që të ngremë votën për të votuar kërkesën për arrestimin e Ballukut me kartonët, na duhet të kemi të paktën njërën nga arsyet që kemi pasur kur e kemi bërë më parë. S’po them të kemi skenë krim apo kushte flagrante, apo prishje të provave, apo tentativë arratisje, që janë arsye të vlefshme. Për tjetrin, kishte akuzë për pastrim parash, korrësin, na u duk se kërkesa ishte e përligjur në atë kohë. Kam dhe diçka, materiali voluminoz, 16 mijë faqe, është në fakt tregues i dobësisë që ka akuza, por ato janë studime, projekteve, urdhëresa, janë arkiva e ministrisë së Infrastrukturës gjatë drejtimit të Ballukut, e marrë me kamion, e çuar për t’u futur në dosje. Dosje që nëse bën provë për diçka, është prova më e fortë e punës së madhe serioze, të Ministrisë së Infrastrukturës, të tjerat janë dokrra. Po të isha një nga ata të Këshillit të Mandateve, do t’i ktheja pas ato 16 mijë faqe janë dokrra. Iluzione optike! I mbani mend ato pasqyrat e thyera kur keni qenë fëmijë, kapnin dellin dhe ia përplasin në sy sikur erdhi dielli përballë, ashtu janë dhe ato 16 mijë faqe.”
Megjithatë, përtej përplasjeve politike, një gjë mbetet e qartë në një shtet ligjor: askush nuk është mbi ligjin. As opozita, as qeveria dhe sigurisht as kryeministri. Në fund të fundit, drejtësia nuk ka nevojë për leje politike për të bërë punën e saj – ajo ka nevojë vetëm për prova dhe për guxim për t’i ndjekur ato deri në fund.
Foto nga Google Images
Artikulli pregatitur nga ACTVUSA
