Moska ka lëshuar një paralajmërim të fortë ndaj Shteteve të Bashkuara të Amerikës lidhur me çështjen e ndihmës ushtarake për Izraelin, duke kërkuar që Uashingtoni të përmbahet jo vetëm nga veprimet konkrete, por edhe nga deklaratat që mund të interpretohen si sinjal mbështetjeje ushtarake. Paralajmërimi u bë nga zëvendësministri i Jashtëm i Rusisë, Sergey Ryabkov, gjatë një interviste për agjencinë shtetërore ruse Interfax.
“Ne i bëjmë thirrje Uashingtonit që të mos ndërmarrë asnjë hap të pamatur në drejtim të mbështetjes ushtarake për Izraelin, qoftë kjo edhe në formën e deklaratave të paqarta apo spekulative,” tha Ryabkov, duke shtuar se çdo ndërhyrje e tillë do të përshkallëzonte më tej tensionet në Lindjen e Mesme dhe do të çonte në pasoja të paparashikueshme për stabilitetin global.
“Shtetet e Bashkuara janë vazhdimisht në epiqendër të të gjitha proceseve. Të thuash se nuk janë përfshirë më herët dhe do të përfshihen tani – mendoj se kjo do të ishte e pasaktë. Është tjetër gjë çfarë ata konsiderojnë për sa i përket ndihmës ushtarake të drejtpërdrejtë për Izraelin. Ne e paralajmërojmë Washingtonin: mos guxoni as të mendoni për këtë. Një veprim i tillë do ta destabilizonte në mënyrë radikale të gjithë situatën”, theksoi Ryabkov.
Kjo deklaratë vjen në një moment kritik, kur konfliktet në rajon janë intensifikuar ndjeshëm, dhe vendet e mëdha po pozicionohen gjithnjë e më hapur përballë njëra-tjetrës. Rusia, e cila tradicionalisht ka ruajtur marrëdhënie të afërta me disa prej kundërshtarëve të Izraelit në rajon – përfshirë Iranin dhe Sirinë – po përpiqet të pozicionohet si kundërpeshë ndaj ndikimit amerikan në këtë krizë.
Deklarata e Ryabkov është një sinjal i qartë se Kremlini e sheh rritjen e përfshirjes së SHBA-së në Lindjen e Mesme si një kërcënim të drejtpërdrejtë për interesat e veta strategjike. Ai shtoi se Moska po ndjek me shqetësim zhvillimet dhe do të përgjigjet në përputhje me rrethanat nëse ndihma amerikane ndaj Izraelit kalon në dimensione konkrete ushtarake.
Ndërkohë, Uashingtoni nuk ka reaguar ende zyrtarisht ndaj paralajmërimit rus. Megjithatë, administrata e presidentit Donald Trump dhe Sekretari i Shtetit Marco Rubio janë shprehur më parë se Shtetet e Bashkuara mbështesin të drejtën e Izraelit për vetëmbrojtje.
Situata e krijuar përforcon rrezikun e përshkallëzimit të mëtejshëm të konfliktit në Lindjen e Mesme dhe shton tensionet në raportet mes fuqive të mëdha botërore. Në një moment kur bota ndodhet në një ekuilibër të brishtë, paralajmërime të tilla si ajo e Moskës e theksojnë nevojën për diplomaci të kujdesshme dhe përmbajtje nga të gjitha palët e përfshira.
Foto nga Google Images
Artikulli i përgatitur nga ACTV
