Sekretari i Shtetit i Shteteve të Bashkuara, Marco Rubio, ka nisur këtë javë një udhëtim diplomatik në Karaibe për t’u takuar me liderë të vendeve anëtare të CARICOM, në një kohë kur marrëdhëniet e SHBA-së me Venezuelen dhe Kuben janë në fokus të politikave të jashtme amerikane.
Sipas Departamentit të Shtetit, Rubio mbërriti në Saint Kitts and Nevis dhe do të marrë pjesë në samitin e liderëve të CARICOM – që përfshin 15 vende anëtare dhe pesë anëtarë të asociuar –të mërkurën e kësaj jave, ku do të diskutojë çështje të sigurisë rajonale, emigracionit, luftës kundër trafikut të drogës, rritjes ekonomike, si dhe sigurisë energjetike dhe shëndetësore.
Në një deklaratë të bërë të hënën nga zëdhënësi i tij, Tommy Pigott, Rubio do të riafirmojë angazhimin e SHBA-së për të punuar ngushtë me vendet e Karaibeve për të rritur stabilitetin dhe prosperitetin në hemisferën tonë perëndimore – një lëvizje që synon të forcojë bashkëpunimin pas tensioneve të fundit politike në rajon.
“Gjatë vizitës së tij, sekretari do të riafirmojë angazhimin e Shteteve të Bashkuara për të punuar me shtetet anëtare të CARICOM për të rritur stabilitetin dhe prosperitetin në hemisferën tonë”, tha zëdhënësi Tommy Pigott
Vizita e zyrtarit të lartë amerikan vjen në një kohë kur Shtetet e Bashkuara kanë intensifikuar presionin ndaj qeverive të Kubës dhe Venezuelës, duke kërkuar reforma politike dhe zgjidhje për krizën energjetike e humanitare në Kubë dhe reagime ndaj situatave të krijuara nga operacionet e fundit ushtarake në Venezuelë.
Takimet e Rubio pritet të shërbejnë gjithashtu për të riafirmuar rolin e SHBA-së si partner kyç për vendet e CARICOM, duke nënvizuar rëndësinë e bashkëpunimit në çështje të përbashkëta si tregtia, siguria dhe fuqizimi ekonomik i rajonit.
Zyrtarët amerikanë theksuan se qëllimi i vizitës është jo vetëm konsolidimi i lidhjeve ekzistuese, por edhe krijimi i platformave të reja bashkëpunimi që mund të sjellin zhvillim ekonomik dhe stabilitet politik në Karaibe. Takimet pritet të përfshijnë kryetarë qeverish, ministra të jashtëm dhe përfaqësues të sektorit privat dhe civil, duke synuar një dialog të gjerë dhe të qëndrueshëm për rajonin.
Analistët vlerësojnë se vizita e Rubio-s është një përgjigje strategjike ndaj sfidave rajonale dhe një sinjal i qartë se SHBA synon të mbajë influencën e saj në hemisferën perëndimore përballë presioneve të jashtme.
Foto nga Google Images
Artikulli pregatitur nga ACTVUSA
