Në kuadër të një vizite të rëndësishme diplomatike në Romë, Zëvendëspresidenti i Shteteve të Bashkuara, J.D. Vance, zhvilloi një takim të nivelit të lartë me presidenten e Komisionit Evropian, Ursula von der Leyen, dhe kryeministren italiane, Giorgia Meloni. Takimi u mbajt pas meshës së fronëzimit të Papa Leoni XIV dhe u fokusua në mundësinë e rifillimit të bisedimeve tregtare mes SHBA-së dhe Bashkimit Evropian, të cilat kanë mbetur të ngrira prej disa vitesh.
“Evropa është një aleate thelbësore e Shteteve të Bashkuara. Sigurisht, kemi edhe mosmarrëveshje – siç ndodh mes miqve – për çështje si tregtia,” deklaroi Vance gjatë konferencës për shtyp, duke theksuar se shpreson për “negociata afatgjata dhe përfitime të ndërsjella tregtare për të dyja palët.”
Në takim ishte i pranishëm edhe Sekretari i Shtetit amerikan, Marco Rubio, i cili nuk bëri një deklaratë publike menjëherë pas takimit, por burime diplomatike konfirmojnë se ai luajti një rol aktiv në diskutime. Rubio është shprehur më herët për rëndësinë e forcimit të marrëdhënieve transatlantike, duke theksuar se “bashkëpunimi i ngushtë me aleatët evropianë është thelbësor për adresimin e sfidave globale dhe ruajtjen e stabilitetit ndërkombëtar.”
Pjesëmarrja e dy figurave të larta të administratës amerikane në këtë takim sinjalizon një përkushtim të ripërtërirë nga ana e Uashingtonit për të thelluar partneritetin ekonomik me Bashkimin Evropian dhe për të ndërtuar ura bashkëpunimi në një kohë sfidash gjeopolitike dhe ekonomike.
Foto nga Google Images
