Presidenti i Shteteve të Bashkuara, Donald Trump, deklaroi se dëshiron të ketë rol personal në përzgjedhjen e liderit të ardhshëm të Iranit pas vdekjes së udhëheqësit suprem Ali Khamenei.
Në një intervistë për mediat amerikane, Trump kritikoi ashpër kandidatin që konsiderohet favorit për ta pasuar atë, Mojtaba Khamenei, djalin e liderit të vrarë. Presidenti amerikan e quajti atë “të papranueshëm” për Shtetet e Bashkuara dhe sugjeroi se Uashingtoni duhet të ketë ndikim në procesin e zgjedhjes së udhëheqjes së re iraniane.
“Ata po humbasin kohën e tyre. Djali i Khameneit nuk ngre peshë. Unë duhet të përfshihem në emërim, si me Delcy [Rodriguez] në Venezuelë. Djali i Khameneit është i papranueshëm për mua. Ne duam dikë që do të sjellë harmoni dhe paqe në Iran,” u shpreh president Trump.
Trump paralajmëroi gjithashtu se nëse lideri i ardhshëm ndjek të njëjtat politika të regjimit aktual, Shtetet e Bashkuara mund të përfshihen sërish në konflikt me Iranin brenda pesë viteve.
Sipas raportimeve, Mojtaba Khamenei shihet nga shumë figura të establishmentit iranian si një nga kandidatët kryesorë për të marrë drejtimin e vendit. Megjithatë, procesi zyrtar i zgjedhjes së liderit suprem kryhet nga Asambleja e Ekspertëve në Iran, një organ klerik që ka autoritetin për të emëruar udhëheqësin e ri.
Deklaratat e Trump vijnë në një moment tensionesh të larta në Lindjen e Mesme, ndërsa konflikti mes SHBA-së, Izraelit dhe Iranit vazhdon të përshkallëzohet. Komentet e tij kanë ngritur debat ndërkombëtar mbi mundësinë e ndërhyrjes së jashtme në procesin e trashëgimisë politike të Iranit.
Në Iran, deri tani nuk është shpallur zyrtarisht se kush do të jetë udhëheqësi i ri i vendit, ndërsa situata politike mbetet e paqartë.
Foto nga Google Images
Artikulli pregatitur nga ACTVUSA
