Një ngjarje e rëndë dhe e turpshme ndodhi gjatë ndeshjes së parakualifikimeve për Kampionatin Botëror të basketbollit mes Maqedonisë së Veriut dhe Rumanisë, e zhvilluar në Kumanovë. Në vend që sporti të shërbente si një urë miqësie dhe bashkimi mes popujve, ai u kthye në një platformë për thirrje nacionaliste dhe gjuhë të pastër urrejtjeje ndaj shqiptarëve – një plagë e rrezikshme që duhet dënuar pa asnjë hezitim.
Refrenë si “Shqiptari i mirë është shqiptari i vdekur” apo “Dhoma e gazit për shqiptarët” janë thirrje të tmerrshme që nuk kanë vend në asnjë shoqëri demokratike dhe as në asnjë sistem që synon paqen. Këto nuk janë vetëm shprehje verbale – janë kërcënime të hapura që nxisin dhunë, frikë, përçarje dhe urrejtje mes komuniteteve që prej dekadash përpiqen të jetojnë në bashkëjetesë.
Shqiptarët në Maqedoninë e Veriut nuk janë të huaj – ata janë ne tokat e tyre dhe pjesë përbërëse e këtij shteti, me të njëjtat të drejta, të njëjtin kontribut dhe të njëjtën të ardhme. Përpjekjet për ta margjinalizuar këtë komunitet nuk janë vetëm të padrejta, por janë të rrezikshme për vetë stabilitetin e vendit dhe rajonit.
Në vend të ndarjes dhe armiqësimit, ne duhet të punojmë për ndërtimin e urave të respektit, bashkëpunimit dhe kuptimit. Historia e Ballkanit na ka mësuar mjaftueshëm se nacionalizmi i verbër dhe retorikat raciste nuk na çojnë askund tjetër përveçse në konflikt, vuajtje dhe regres.
Kjo është një thirrje për autoritetet – të mos heshtin përballë kësaj gjuhe të rrezikshme, por të veprojnë menjëherë për të dënuar dhe ndëshkuar autorët, për të garantuar që sporti të mos shndërrohet më në skenë urrejtjeje.
Dhe kjo është gjithashtu një thirrje për qytetarët – maqedonas, shqiptarë, greke, turq, romë apo të çfarëdo përkatësie tjetër – që të mos bien pre e provokimeve, por të qëndrojnë të bashkuar, sepse vetëm bashkë mund të ndërtojmë një shoqëri të drejtë, të sigurt dhe paqësore për të gjithë.
Urrejtja nuk është zgjidhje. Bashkëjetesa është e vetmja rrugë që ka të ardhme.
Foto nga Google Images
Artikulli i përgatitur nga ACTVUSA
