Një sulm i rëndë me raketa balistike ka goditur qytetin Sumy në Ukrainë, duke shkaktuar një tragjedi të madhe. Sulmi, i cili ndodhi gjatë festimeve të Dielës së Palmave, ka lënë pas 34 të vdekur dhe mbi 117 të plagosur, përfshirë edhe 15 fëmijë.
Shtetet e Bashkuara të Amerikës dhe Bashkimi Evropian kanë reaguar ashpër ndaj këtij akti barbar. Sekretari amerikan i Shtetit, Marco Rubio, e ka cilësuar sulmin si një “ngjarje të tmerrshme” dhe ka shprehur ngushëllime për viktimat.
“Ky sulm i tmerrshëm është një kujtesë tragjike se pse Presidenti Trump dhe Administrata e tij po i kushtojnë kaq shumë kohë përpjekjes për t’i dhënë fund kësaj lufte dhe për të arritur një paqe të qëndrueshme”, shkroi Sekretari Rubio në rrjetin X, teksa shprehu ngushëllime për familjarët e viktimave.
Rubio ka theksuar se ky sulm është një kujtesë tragjike për nevojën e një paqeje të qëndrueshme dhe përpjekjet e vazhdueshme të administratës amerikane për t’i dhënë fund konfliktit.
Nga ana tjetër, Presidentja e Komisionit Evropian, Ursula von der Leyen, ka dënuar sulmin duke e quajtur një akt barbar që kërkon masa urgjente. Ajo ka deklaruar se Evropa do të vazhdojë të mbajë presion të fortë ndaj Rusisë deri në arritjen e një paqeje të drejtë dhe të qëndrueshme, sipas kushteve të Ukrainës.
Liderët evropianë, përfshirë Presidentin e Francës, Emmanuel Macron, dhe Kryeministren e Italisë, Georgia Meloni, kanë kërkuar masa të fuqishme ndaj Moskës për ta detyruar të pranojë një armëpushim. Ky sulm ka ngritur shqetësime të mëdha mbi intensifikimin e konfliktit dhe mbi nevojën për veprime të koordinuara ndërkombëtare për të ndaluar agresionin rus.
Sulmi në Sumy ka tronditur jo vetëm Ukrainën, por edhe komunitetin ndërkombëtar, duke nxitur thirrje për veprime të menjëhershme. Ndërkohë, qytetarët e Sumy po përballen me pasojat e rënda të këtij akti, duke kërkuar ndihmë dhe mbështetje për të përballuar krizën humanitare.
Foto nga Google Images
