Zëvendëspresidenti amerikan JD Vance ka bërë deklarata të forta mbi marrëdhëniet transatlantike, duke theksuar se Evropa është një aleat i rëndësishëm i Shteteve të Bashkuara, por nuk mund të mbetet një “vasal i përhershëm” në aspektin e sigurisë dhe tregtisë. Në një intervistë të dhënë për faqen britanike UnHerd, Vance shprehu shqetësimet e tij mbi balancën e përgjegjësive mes dy palëve dhe rolin e SHBA-së në mbështetjen e vazhdueshme të Evropës.
Në intervistën e tij, Vance theksoi se marrëdhëniet tregtare mes SHBA-së dhe Evropës duhet të jenë më të balancuara dhe të bazuara në reciprocitet. Ai shprehu shqetësimin se disa marrëveshje tregtare favorizojnë më shumë Evropën, duke lënë SHBA-në në një pozicion të pafavorshëm.
“Ne e konsiderojmë Evropën aleatin tonë. Ne thjesht duam një aleancë në të cilën evropianët janë pak më të pavarur dhe kjo do të reflektohet në sigurinë dhe marrëdhëniet tona tregtare. Nuk është mirë për Evropën dhe nuk është në interesin e Amerikës që Evropa të jetë vasal i përhershëm i Shteteve të Bashkuara përsa i përket sigurisë”, theksoi ai.
Vance argumentoi se është koha që Evropa të marrë më shumë përgjegjësi për sigurinë e saj dhe të kontribuojë më shumë në mbrojtjen kolektive. Ai kritikoi varësinë e vazhdueshme të disa vendeve evropiane nga SHBA-ja për mbështetje ushtarake dhe ekonomike, duke e cilësuar këtë si një model që duhet të ndryshojë.
“Realiteti është, është brutal të thuhet, por është e vërtetë, se e gjithë infrastruktura evropiane e sigurisë është subvencionuar nga Shtetet e Bashkuara që kur kam lindur. Me përjashtim të Francës, Mbretërisë së Bashkuar dhe Polonisë, shumica e shteteve evropiane nuk kanë ushtri të afta për të ofruar një mbrojtje të arsyeshme”.
Deklaratat e Vance kanë ngjallur reagime të ndryshme në arenën ndërkombëtare. Disa liderë evropianë i kanë cilësuar komentet e tij si një thirrje për një rishikim të marrëdhënieve transatlantike, ndërsa të tjerë kanë shprehur shqetësimin se kjo qasje mund të dobësojë aleancën mes SHBA-së dhe Evropës në një moment kritik për sigurinë globale.
Foto nga Google Images
