Vlorë, 21 maj 2025 — Planet e operatorëve turistikë për të sjellë turistë të organizuar në jug të Shqipërisë këtë verë janë përballur me një goditje të papritur, pas konfirmimit se Aeroporti Ndërkombëtar i Vlorës nuk do të jetë funksional për fluturime komerciale gjatë sezonit veror të këtij viti.
Turoperatorët kishin parashikuar nisjen e fluturimeve charter me një numër të reduktuar përmes aeroportit të ri, duke u bazuar në premtimet institucionale dhe zhvillimet teknike të muajve të fundit. Megjithatë, kjo nuk është më një mundësi reale. Si pasojë, ata ndodhen në një situatë të vështirë me agjencitë partnere të huaja, pasi destinacionet tashmë janë rezervuar me parapagesë në Vlorë, ndërkohë që fluturimet duhet të realizohen nga Tirana — një zgjidhje që po rezulton jo e zbatueshme për shkak të mungesës së frekuencave të lira në Aeroportin e Rinasit.
Kreu i Unionit Turistik Shqiptar, Rrahman Kasa, tha për mediat se kontratat me garanci për hotele në zonën e Vlorës ishin nënshkruar që në verën e kaluar, me pritshmëri të qarta për hapjen funksionale të aeroportit të ri. Ai theksoi se për herë të parë në këtë shkallë ishin vendosur marrëveshje të parapaguara me disa hotele të përzgjedhura, të dedikuara për pritjen e turistëve të organizuar nga Polonia. Tani, me pamundësinë për të realizuar fluturimet nëpërmjet Vlorës, këto kontrata janë vënë në rrezik.
“Për shumë nga këto agjenci, ka qenë një investim serioz në kohë dhe para. Ne po përpiqemi të negociojmë me partnerët për të gjetur një alternativë që minimizon dëmin,” deklaroi Kasa.
Në fillim të majit u krye fluturimi i parë certifikues në Aeroportin e Vlorës, me praninë e përfaqësuesve të qeverisë që theksuan rëndësinë strategjike të investimit, i cili deri më tani ka arritur në rreth 140 milionë euro. Megjithatë, përtej deklaratave optimiste, mbetet e paqartë se kur do të nisin zyrtarisht fluturimet komerciale, një pasiguri që tashmë ka pasoja konkrete për sektorin e turizmit.
Aeroporti i Vlorës ishte parashikuar të përmirësonte ndjeshëm aksesin drejt rivierës shqiptare dhe të diversifikonte ngarkesën e trafikut ajror nga Tirana. Por për këtë sezon, operatorët turistikë do të duhet të improvizojnë me burimet ekzistuese, duke u përballur me vështirësi logjistike dhe rrezik për humbje financiare.
Foto nga Google Images
