Presidenti i Iranit, Masoud Pezeshkian, ka ritheksuar se Teherani nuk ka synim të zhvillojë armë bërthamore, por nuk do të heqë dorë nga e drejta e tij për të vazhduar pasurimin e uraniumit për qëllime civile. Deklarata u bë pak përpara nisjes së bisedimeve mes përfaqësuesve iranianë dhe atyre amerikanë në Zvicër, një takim që konsiderohet me rëndësi të veçantë për të ardhmen e programit bërthamor iranian dhe stabilitetin në rajon.
“Nuk është asgjë e re. Ne mund ta deklarojmë edhe me shkrim se nuk kemi ndërmend të ndërtojmë bombë atomike,” citohet të ketë thënë Pezeshkian nga faqja zyrtare e Presidencës iraniane. Megjithatë, ai shtoi se Irani nuk do të pranojë kufizime që cenojnë të drejtën e tij për pasurimin e uraniumit.
“Ne nuk do të heqim dorë nga e drejta jonë për pasurim,” theksoi presidenti iranian, duke nënvizuar se kjo e drejtë garantohet nga Traktati i Mospërhapjes së Armëve Bërthamore (NPT), të cilin Irani e ka nënshkruar.
Çështja e pasurimit të uraniumit ka qenë prej vitesh në qendër të tensioneve mes Iranit dhe Perëndimit. Ndërsa autoritetet iraniane argumentojnë se programi i tyre bërthamor ka ekskluzivisht qëllime civile, si prodhimi i energjisë dhe kërkimet shkencore, Shtetet e Bashkuara dhe disa aleatë perëndimorë kanë shprehur vazhdimisht shqetësime se niveli i pasurimit të uraniumit mund t’i afrojë iranianët me kapacitetin për të ndërtuar armë bërthamore.
Deklaratat e Pezeshkianit vijnë në një moment delikat diplomatik, ndërsa palët po kërkojnë të gjejnë një terren të përbashkët për të shmangur përshkallëzimin e mëtejshëm të krizës. Bisedimet në Zvicër pritet të fokusohen pikërisht tek programi bërthamor iranian, heqja e sanksioneve ekonomike dhe garancitë ndërkombëtare për transparencën e aktiviteteve bërthamore të Teheranit.
Megjithëse presidenti iranian ka përsëritur se vendi i tij nuk kërkon armë atomike, insistimi për të vazhduar pasurimin e uraniumit mbetet një nga pikat më të debatueshme në negociatat me Uashingtonin. Rezultati i këtyre bisedimeve mund të ketë ndikim të drejtpërdrejtë jo vetëm në marrëdhëniet SHBA-Iran, por edhe në sigurinë e gjithë Lindjes së Mesme.
Foto nga Google Images
Artikulli pregatitur nga ACTVUSA
