Një kapitull i ri në marrëdhëniet mes Shteteve të Bashkuara dhe Shqipërisë ka nisur zyrtarisht me marrjen e detyrës nga Eric Wendt, ambasadori i ri amerikan në Tiranë. Në rezidencën zyrtare të ambasadorit, Trupa e Marinsave të Shteteve të Bashkuara ngriti flamurin amerikan, në një ceremoni që përcolli simbolikën e fillimit të një misioni të ri diplomatik.
Vetëm pak ditë më parë, më 26 Shtator, Wendt paraqiti letrat kredenciale te Presidenti Bajram Begaj në Pallatin e Brigadave, duke nisur zyrtarisht misionin e tij diplomatik në Shqipëri. Begaj dhe Wendt zhvilluan më pas edhe një takim kokë më kokë, ku u riafirmua rëndësia e partneritetit strategjik mes dy vendeve.
Ambasada amerikane e shoqëroi momentin me një mesazh të drejtpërdrejtë, duke e lidhur ardhjen e ambasadorit të ri me forcimin e aleancës shqiptaro-amerikane.
“Një kapitull i ri nis në Shqipëri! Trupa e Marinsave të Shteteve të Bashkuara ngriti flamurin amerikan në rezidencën zyrtare, teksa Ambasadori Wendt nis detyrën e tij. Nën udhëheqjen e Presidentit Trump, aleancat tona janë më të forta kur qëndrojmë së bashku, ndajmë përgjegjësitë dhe punojmë për një të ardhme më të begatë e më të sigurt për të dy vendet tona”, shkruan Ambasada e SHBA-së.
Emërimi i Wendt vjen pas një periudhe gati trevjeçare gjatë së cilës Ambasada amerikane në Tiranë nuk kishte një ambasador të konfirmuar. Ai u nominua nga Presidenti Donald Trump në prill të këtij viti dhe u konfirmua nga Senati amerikan në Qershor, me 51 vota pro dhe 47 kundër.
Wendt sjell në Tiranë një përvojë të gjatë në ushtri, siguri dhe bashkëpunim ndërkombëtar. Ai ka shërbyer për më shumë se 34 vjet në ushtrinë amerikane dhe ka mbajtur pozicione të larta drejtuese, përfshirë komandën e Komandës së Operacioneve Speciale të NATO-s. Gjatë kësaj periudhe ai ka punuar edhe me trupa dhe drejtues ushtarakë shqiptarë, ndërsa në Afganistan ka shërbyer në një strukturë komanduese ku përfshiheshin edhe trupa shqiptare.
Profili i tij tregon se siguria dhe mbrojtja do të jenë pjesë e rëndësishme e misionit të ri në Tiranë. Gjatë dëgjesës së tij në Senatin amerikan, Wendt veçoi forcimin e partneritetit në mbrojtje dhe siguri, luftën kundër korrupsionit dhe krimit të organizuar, si dhe rëndësinë e bashkëpunimit kundër grupeve kriminale transnacionale. Ai gjithashtu theksoi rëndësinë e një SPAK-u të pavarur dhe të mbrojtur nga ndikimi politik.
Për Shqipërinë, ardhja e një ambasadori me një profil kaq të lidhur me sigurinë dhe strukturat e NATO-s e vendos marrëdhënien me Uashingtonin në një fazë ku bashkëpunimi në mbrojtje, siguri, luftën kundër krimit dhe interesat e përbashkëta strategjike pritet të mbeten në qendër.
Flamuri amerikan që u ngrit në rezidencën zyrtare nuk ishte vetëm pjesë e një ceremonie protokollare. Ai shënoi fillimin e një mandati të ri dhe rikthimin e një përfaqësimi të plotë diplomatik amerikan në Tiranë. Me Eric Wendt në krye të misionit, Uashingtoni dhe Tirana hyjnë në një kapitull të ri të partneritetit, me theks te siguria, përgjegjësia e përbashkët dhe forcimi i lidhjeve mes dy vendeve.
Foto nga US Embassy in Tirana
Artikulli përgatitur nga ACTVUSA
