Presidenti amerikan, Donald Trump, dhe presidenti francez, Emmanuel Macron, po zhvillojnë një takim të rëndësishëm në Francë në kuadër të samitit të G7, ndërsa në këto momente po mbajnë edhe një konferencë të përbashkët për shtyp.
Takimi vjen në një moment delikat për politikën ndërkombëtare, vetëm një ditë pasi administrata Trump njoftoi arritjen e një marrëveshjeje paraprake me Iranin për t’i dhënë fund konfliktit që ka tronditur Lindjen e Mesme gjatë muajve të fundit. Çështja iraniane pritet të jetë një nga temat kryesore të diskutimeve mes liderëve botërorë në samit.
Në qendër të bisedimeve janë gjithashtu lufta në Ukrainë, siguria europiane, tregtia globale dhe marrëdhëniet ekonomike mes SHBA-së dhe Bashkimit Europian. Liderët europianë po kërkojnë të rikthejnë vëmendjen e Uashingtonit te konflikti në Ukrainë dhe te koordinimi i politikave perëndimore përballë Rusisë.
Megjithatë, takimi zhvillohet edhe në sfondin e një përplasjeje të re tregtare mes Parisit dhe Uashingtonit. Trump ka paralajmëruar tarifa deri në 100% ndaj verërave franceze nëse Franca nuk heq taksën e saj mbi gjigantët amerikanë të teknologjisë, ndërsa Macron ka deklaruar se Franca nuk do të tërhiqet nga politika e saj fiskale.
Pavarësisht mosmarrëveshjeve, të dy liderët po përpiqen të paraqesin një front të bashkuar përballë krizave globale që po dominojnë axhendën ndërkombëtare. Pas përfundimit të samitit, Trump dhe Macron pritet të zhvillojnë edhe një darkë zyrtare në Pallatin e Versajës, një takim simbolik që synon të theksojë rëndësinë e marrëdhënieve franko-amerikane.
Foto nga Goggle Images
Artikulli pregatitur nga ACTVUSA
