Madilyn Batiste është përshtatur në mënyrën më të mirë me jetën në qytetin e Ferizajt.
Ndihet krenare që luan për klubin e Ferizajt, anëtare e Superligës B të Kosovës.
Është familjarizuar me klubin dhe ajo që e befason më shumti – mikpritja bujare në familjet shqiptare.
Volejbollistja amerikane flet për jetën e saj në Ferizaj, cilin ushqim e preferon më së shumti, a janë më të shijshme portokallet në Kosovë apo në Amerikë dhe pse e çudit një fakt nga ajo si veprojnë në Kosovë dhe në Amerikë.
Madilyn Batiste iu është mirënjohëse trajneres së Ferizajt, Arta Ramadanit dhe drejtuesve të klubit, që bëjnë çka është e mundur për t’i pas kushtet sa më të mira.
Flet edhe muajin për muajin e shenjtë – të agjërimit.
Madilyn Batiste sot ka edhe një ditë të veçantë, datëlindjen, i mbushi 24 vite.
Madilyn Batiste: Më ka bërë vërtet përshtypje kultura ‘si në familje’ në këtë ekip.
Unë kam qenë në gjendje të përshtatem shpejt, mu njohur me vajzat më të reja.
“Bota sot”: Jeta në qytetin e Ferizajt dhe në përgjithësi në Kosovë, çfarë ju lë më shumë përshtypje veçmas qytetarët?
Madilyn Batiste: Kultura dhe besimet fetare.
Ndihem shumë mirënjohëse që jam në gjendje të përjetoj besimet fetare të ndryshme nga të miat.
Të jetosh këtu gjatë Ramazanit ka qenë një përvojë shumë interesante dhe e lezetshme.
Më ka pëlqyer të takohem me të gjitha brezat e njerëzve këtu dhe jam ndjerë e mirëpritur në shumicën e mjediseve.
Ka qenë vërtet e veçantë.
“Bota sot”: Cilin ushqim e preferoni më shumë?
Madilyn Batiste: Më pëlqejnë absolutisht të gjitha llojet e ushqimeve tradicionale këtu.
Më pëlqejnë mishi i pulës dhe orizi, buka e bërë në shtëpi dhe të gjitha mënyrat e ndryshme të përgatitjes së perimeve këtu.
Gjithashtu, i dua absolutisht portokallet këtu, janë më të mira se në Amerikë.
“Bota sot”: Ferizaj po tregon lojëra të mira, a jeni të kënaqura me rezultatet e deritanishme?
Madilyn Batiste: Jam shumë e lumtur me rritjen e ekipit tonë që kur kam ardhur.
Vajzat kanë treguar se duan të përmirësohen dhe të marrin këshilla nga Faith dhe unë, kështu që ka qenë e lehtë të ndajmë atë që dijmë nga përvoja jonë.
Jam krenare për rritjen tonë dhe mendoj se rezultatet e kanë treguar më së miri.
Jam e emocionuar që shoh rritjen e klubit për vitin e ardhshëm!
“Bota sot”: Sa jeni e kënaqur me drejtuesit e klubit?
Madilyn Batiste: Drejtuesit e klubit kanë bërë një punë të shkëlqyeshme për të na mbështetur dhe për besimin e treguar që nga dita që arritëm këtu.
Ata gjithmonë sigurohen që ne të ushqehemi, të kujdesemi dhe që të janë të kënaqur me situatën tonë.
Na kanë mësuar disa gjëra se si luhet volejbolli në Europë, pasi është ndryshe nga Amerika. Ata na mirëpresin në shtëpitë e tyre dhe na integrojnë në familjet e tyre.
Ndihem e dashur dhe e mbështetur nga të gjithë në klub.
“Bota sot”: A ka cilësi Superliga B?
Madilyn Batiste: Sigurisht që po. Skuadrat e para kanë bërë shumë për të treguar se duhet të jenë në vendin e 7-të dhe të 8-të në Superligën A.
Nëse federata zgjedh të marrë 8 ekipe, mendoj se ato mund të garojnë mirë.
Do të doja të shihja skuadrën tonë tani të konkurrojë kundër disa skuadrave të Superligës A, sepse ne jemi përmirësuar shumë që kur luajtëm në Turneun Memorial sezonin e kaluar.
“Bota sot”: Cila ishte ndeshja që ju ka mbetur në zemër dhe ju ka zhgënjyer?
Madilyn Batiste: Patjetër ndeshja me KV Suti Sport. Nëse do t’i luanim përsëri, e di që do të performonim shumë më mirë dhe ndoshta do të fitonim.
Nuk ishim të përgatitur për ndeshjen psikikisht apo fizikisht dhe kjo u duk në fushë. Ne jemi rritur shumë që nga ajo ndeshje dhe fitoret tona e kanë dëshmuar këtë.
“Bota sot”: Cili është ndryshimi i jetës së Kosovës dhe asaj amerikane?
Madilyn Batiste: Mendoj se ndryshimi kryesor mes jetës së Kosovës dhe asaj amerikane është ritmi.
Kam vënë re se koha dhe ndjenja e urgjencës është shumë më e qetë këtu sesa në Amerikë.
Për shembull, në universitetin tim, nëse do të mbërrinim me vonesë në autobus ditën e lojës ose në ndonjë praktikë, do të kishte një lloj pasoje.
Duhet të mbërrinim gjithmonë, të paktën 10 minuta më herët për të mos qenë vonë.
Këtu, të jesh në kohë ose disa minuta më vonë është më normale dhe nuk do të ndëshkohesh. Shumë gjëra janë shumë më të qeta këtu sesa në Amerikë.
/BotaSot/
