Kreu i Partisë së Lirisë, Ilir Meta, shpreh shqetësim për numrin e lartë të aplikantëve shqiptarë për azil në Britaninë e Madhe.
Meta, referuar të dhënave nga Zyra e Statistikave të Emigracionit në Mbretërinë e Bashkuar, thotë se tronditës është fakti se rreth 42% e aplikimeve janë bërë nga vetë të miturit si aplikantë kryesorë, ndërsa 13.7 % e kërkesave janë bërë nga fëmijë më pak se 18 vjeç.
Meta bën përgjegjës Edi Ramën dhe keqqeverisjen e tij, ndërsa thotë se më 14 maj është dita për ta ndëshkuar me votë këtë të fundit.
Reagimi i plotë:
Numri i aplikimeve për azil në Britaninë e Madhe nga shtetasit shqiptarë shënoi nivel rekord për vitin 2022! Të dhënat më të fundit të publikuara nga Zyra e Statistikave të Emigracionit në Mbretërinë e Bashkuar tregojnë se rreth 16 mijë shqiptarë kërkuan azil në Britani dhe se 72% e tyre ishin më pak se 29 vjeç. Tronditës është fakti se rreth 42% e aplikimeve janë bërë nga vetë të miturit si aplikantë kryesorë, ndërsa 13.7 % e kërkesave janë bërë nga fëmijë më pak se 18 vjeç. Të rinjtë shqiptarë ikin nga Shqipëria, si nga asnjë vend tjetër i rajonit, për shkak të qeverisjes së korruptuar 10 vjeçare të Edi Ramës, që i ka detyruar t’u hipin gomoneve të shpresës, duke rrezikuar edhe jetën e tyre. Përgjegjësia e shpopullimit të Shqipërisë është e Ramës, ndaj largimi i tij është domosdoshmëri për shpëtimin e vendit!
Më 14 Maj është dita për të ndëshkuar me votë përgjegjësin kryesor të shpopullimit!
